Maleraq Arctica Uummannami pisortatigoortumik atserneqarpoq

Royal Arctic Linep umiarsuaataa nutaaneq Maleraq Arctica annillisakkamik persuarsiorlunili nalliuttorsiornikkut ullumi Uummannap umiarsualiviani pisortatigoortumik atserneqarpoq. 79-inik ukiulik Louise Zeeb nuannaarlunilu attortissimavoq nunaqarfiliartaat 67 meterisut takitigisoq, Uummannap, nunaqarfiisa aammalu Immikkoortoq Avannaani umiarsualiviup qitiusup Aasianniittup akornanni ingerlaalereersoq, puiaasamik kuillugu atseramiuk.    

Immikkut qaaqqusat ikitsunnguit atsiisussaq Louise Zeeb siulersortigalugu talittarfimmut tikilluaqquneqarput. Covid-19 pillugu maleruaqqusat naammassiniarlugit qaaqqusat amerlanerpaamik 20-kkuutaartinneqarlutik immikkoorput.

Erinarsoqatigiit Erinaq atsiinermik ammaallutik Villads Villadsenip taalliaa erinniaalu ”Nunavit siumut” erinarsorpaat. Erinarsuut tusarnerluinnartoq atsiisup Louise Zeebip nunaqarfiliartaatip atserneqarneranut atatillugu immikkut kissaatigisaraa.

Pisortaaneq Verner Hammeken tikilluaqqusereermat atsiisussap Louise Zeebip puiaasaq champagnemik imalik, putoortuusamik kusassakkamik puulik, umiarsuup saneraanut miloriuppaa ima oqaasertalerlugu: - ”Pajuttaat Uummannamut pajulluni tikikkaangat nuannaajallatsitsisarnikooqaaq nutaartugassaqalersittarmatigut ukiorsuaq amigaatigisartakkagut tikiukkaangagit. Ilimagaaralu aamma umiarsuup uuma pilersuisussatta taamatut misigitittarumaaraatigut pilersorluartarumaaraatigullu. Pilersuilluarinalu. Atserpakkit Maleraq Arctica”.

Louise Zeebip ukiut 60-it sinnerlugit suliffigisaani – sulilumi ilaatigut suliffigisaani - Uummannami Meeqqat Angerlarsimaffianni meeqqat inuusuttullu najugallit ilaasa erinarsornermik qitinnermillu silagissuarmi seqinnarissuarmilu takutitsinerat alutorsaatigineqaqaaq.

Royal Arctic Linep Uummannarmiut tamaasa qutsavigai illoqarfimmiunut nuannatsitsinissap taamaatiinnartariaqarneranut paasinnilluarmata, aammattaaq Royal Arctic Linep Facebookkimi qupperneratigut malinnaasut pilluaqqusisullu tamaasa qutsavigaagut.