Royal Arctic Line Uummannap pigisaani ammaassivoq
Uummannap pigisaani nunaqarfinni arlalinni qerititsiveqarfiit ulikkaariartulerput. Royal Arctic Linep nunaqarfiliartaataa nutaaq Siuana Arctica Nuummut ullumi nal. 13 tikissaaq, sapaatit akunnerannilu uani kingusinnerusukkut, Mary Arctica peqatigalugu, Avannaanukartinneqassaaq nunaqarfiit eqqugaasut tikinniassallugit.
Siuana Arctica Royal Arctic Linep umiarsuaata nutaanersaraat, Uummannallu pigisaanukarnissaq umiarsuup Nunatsinni assartuussinerisa siullersarissavaat.
Illoqarfinni nunaqarfinnilu sikusartuniittuni qerititsiveqarfiit aallerfiginissaannut ammaassinissaq Royal Arctic Linep ukiut tamaasa uteqqiattumik immikkut ittumik eqqumaffigisarpaa. Sumiiffimmi sikoqarnera suli nalorninartoqarpoq, Mary Arcticalli sikumik aserorteraluni aqqutissiuussisinnaanissaa neriuutigineqarpoq Siuana Arctica taamaalilluni suliassaq pisariaqartoq ingerlassinnaaniassammagu sumiiffimmilu qerititsiveqarfiit tikillugit.
Tamatumunnga peqatigitillugu nunaqarfiit nioqqutissanik nutaanik pajunneqarnissaat KNI peqatigalugu sulissutigineqarpoq.