Royal Arctic Line Islandimi niuerfimmut ilannguppoq

Tusagassiorfinnut nalunaarut

Nuuk, septembarip 24-ani 2020

Royal Arctic Linep DHL Global Forwarding, Royal Arctic Line sinnerlugu Islandimi sullissisussatut toqqarneqartoq, ineriartortitsiffiusumik suleqatigiinnissamik isumaqatigiissuteqarfigaa.

Royal Arctic Line niuerfimmi piffissami sivisuumi misissuereerluni Islandimi namminerisaminik allaffittaarani Royal Arctic Linep Islandimi soqutigisaanik isumaginnittussamik toqqaavoq. DHL suliffeqarfissuuvoq nunarsuaq tamakkerlugu assartuussinikkut aaqqiissutinik neqerooruteqartoq piffissamullu naleqquttumik IT-kkut attaveqaasersuuteqartoq, taamaalillunilu Royal Arctic Linep taamatullu Nunatta Reykjavikkitigoortumik nunani tamalaani niuerfinnut attavilernissaannut periarfissiisoq.

”Matumani isumaqatigiissuteqarnitsigut DHL-ip nunarsuaq tamakkerlugu assartuussinikkut attaveqarfigisaanik atuisinnaalerpugut. Tamannalu Islandimi sullitarilerumaakkatsinnut pitsaalluinnartunik periarfissaqalersitsissaaq. Aammali Europamut, Amerika avannarliup nunavittaanut nunarsuullu sinneranut attaveqarnitsinni Islandip eqiteriffittut pingaarutilittut inissisimaneranut nukittorsaataassaaq. Nunatta niueqatigiuminarnerulersinnissaanut anguniakkatsinni annertuumik alloriaqqissaagut”, umiarsuaatileqatigiffiup pisortaanera Verner Hammeken taama oqarpoq.

Royal Arctic Linep containerit Nunatsinnut ukiut tamaasa assartortagai Nunatsinnit avammut assartortagaanit amerlanerusarput. Nutaamillu assartueriaaseqalernermi Islandip sapaatit akunneri tamaasa aqqusaarneqartalernerata malitsigisaanik umiarsuarni inissap sinneruttup atorluarnissaanut periarfissaqalersitsivoq Islandimi sullitanut, Royal Arctic Linemut taamatullu Nunatsinnut iluaqutaasussamik.

”Royal Arctic Linep Kalaallit Nunaata, Islandip nunallu avannarliit allat akornanni niueqatigiinnermik annertusaalluni ineriartortitsinerani tapersersorsinnaanera nuannaarutigaarput. Reykjavikkip Atlantikup avannaani eqiteriffittut atorneqalernerata Kalaallit Nunaanni niuerfimmut sunik periarfissaqalersitsissanersoq takussallugu pissanganarpoq”, DHL Global Forwardingip Danmarkimi immikkoortortaani pisortaaneq Torben Pagh taama oqarpoq.

Royal Arctic Linep DHL-illu suleqatigiinnerat septembarip 28-ani 2020-mi pisortatigoortumik aallartissaaq.

Inniminniinissamut Lineagency Island e-mailikkut Lineragency.is@dhl.com-imut oqarasuaatikkulluunniit +45 7217 7179-imut attavigineqassaaq.

DHL assartuussinermik suliaqarfiup iluani nunarsuarmi siuttuuvoq. DHL-imi immikkoortut assartuussinikkut sullissinernik immikkuullarissunik neqerooruteqarput, nunami namminermi nunanilu tamalaani poortukkanik pajuttuinermik, internettikkut pisianik nassiussuinermik, nukingiussassanik nunani tamalaani silaannakkut imaatigullu assartuinermik suliffissuaqarnermilu assartuussinikkut aaqqiissutinik neqerooruteqarlutik. DHL nunarsuaq tamakkerlugu nunani nunallu immikkoortuini 220-nit amerlanerusuni 380.00-it sinnerlugit sulisoqarluni inunnik suliffeqarfinnillu isumannaatsumik tatiginartumillu attaviliisuuvoq nunarsuarlu tamakkerlugu niuernikkut aqqutissiuussisuulluni. Niuerfinnut siuariartortitsiffiusunut suliffissuaqarnernullu pioreersunut immikkuullarissunik aaqqiissuteqarpoq, ilaatigut teknologiimut, uumassusilerinermik ilisimatusarnermut peqqissaanermullu, teknikkimut, tunisassiornermut, nukissiuuteqarnermut, qamutinut assakaasulinnut pisiniarfinnullu, DHL taamaalilluni nallernissaqarani "The logistics company for the world"-itut inissisimavoq.

DHL Deutsche Post DHL Groupip ilagaa. Suliffeqarfissuaq 2019-imi 63 milliardit eurot sinnerlugit kaaviiaartitaqarpoq. Ingerlatsinermini piujuaannartitsinissamik anguniagaqarnermini inuiaqatigiinnullu avatangiisinullu pisussaaffeqarluni ingerlatsinermigut suliffeqarfissuaq nunarsuarmioqatigiinnut pitsaasumik tapertaavoq. Deutsche Post DHL Group ukioq 2050 nallertinnagu CO2-mik aniatitsinerup 0-inngortinnissaanik anguniagaqarpoq.

Attaveqarfissanut paasissutissat:

 

Royal Arctic Line:                        Aviâja L. Lennert, pisortaanerup tullia

                                                          Email: avll@ral.gl

                                                          Oqarasuaat: +299 349103

 

DHL:                                                 Christoffer K. Hagen, Head of HR & Communications, DHL Global Forwarding

                                                          Email: christoffer.hagen@dhl.com

                                                          Oqarasuaat: +4525233000