Royal Arctic Line containerinik Nunatsinnukartunik Aarhusimi tigooraasinnaanngorpoq

Royal Arctic Linep nutaamik assartueriaaseqalerneratigut umiarsuit imarpikkoortaatit Danmark, Sverige, Norge, Savalimmiut, Island Nunarpullu aqqusaartalerpaat. Danmarkimi umiarsualiviit aqqusaarneqartartut tassaallutik Aalborg aamma Aarhus. Royal Arctic Linep Aalborgimi umiarsualivik nammineerluni qangaaniilli ingerlataraa, taamaattumillu Aalborgimi aningaasartuutit containerit assartorneqartut amerlassusaat apeqqutaatinnagu taakkuujuaannarput.

Sullitatta ilaat Aarhusimi umiarsualiviup atornissaanik ullumikkut kissaateqarput, Aalborgimi Umiarsualivimmut taarsiullugu ataqatigiissilluguluunniit. Taamatut kiffartuussinissamik neqerooruteqarumalluta Aarhusip Umiarsualiviata atornissaanut ammaassivugut sullitatsinnut akiliuteqartitsilluta, akiliutillu taakku Aarhusimit Aarhusimut nassiussanik assartuinermi aningaasartuutinut matussutigineqassapput. Taamaaliornikkut Aarhusip atorneqarnerata kingunerisaanik nassiussat Aalborgikkoortut annikillissagaluarpata Aalborgimi akinik qaffaanissaq pinngitsoortissinnaavarput. Periarfissarlu alla tassaavoq Aalborgikkuinnaq nassiussanik assartuineq. Aalborgip Nunattalu akornanni assartuinermut akit allannguuteqanngillat. Sullitat ataasiakkaat Aarhusimi Umiarsualiviup atorneratigut allatigut sipaaruteqarsinnaanermik atorluaasinnaaneq nammineerlutik aalajangigassaraat. Aarhus taamaalilluni nammineq qinigassaavoq allanngortitsinermilu siusissukkut neqeroorutaalluni, aamma periarfissaq nutaajummat akinik qaffaanerunngilaq.

Aarhusip Umiarsualivia atorneqassappat Royal Arctic Line assartueriaatsimi nutaami Nunatsinnut Nunatsinniillu nassiussanik assartuinerup saniatigut, assersuutigalugu Islandip Skandinaviallu akornanni nassiussanik assartuinissamik neqerooruteqarsinnaanissaa aamma pisariaqarpoq. Niuerfillu taanna nutaarluinnaavoq, Royal Arctic Linemit siornatigut iluaqutigineqarsinnaasimanngitsoq. Ingerlatseqatigiiffik taamaalilluni saniatigut isertitaqarnissamut periarfissaqalerpoq, isertitat piginnittunut, taamatullu aamma inuiannut kalaallinut iluaqutaasussat. 

Paasissutissat
Royal Arctic Linep Aalborgimi ingerlatsineranut aningaasartuutit tassaapput aningaasartuutit aalajangersimasut. Imaappoq Aalborgimit containerinik nassiussat 100-ppata 1000-iuppataluunniit aningaasartuutaasartut tunngaviatigut taakkuujuaannarput. Aarhusimi aningaasartuutit tassaapput aningaasartuutit nikerartut, ima paasillugu containerit Aarhusimut Aarhusimiillu nassiunneqartut amerlassusiat apeqqutaatillugu aatsaat akiliuteqartoqartarluni.