Royal Arctic Line assartuinermut akinik appaavoq
Royal Arctic Line A/S umiatsianik, biilinik sanaartornermilu maskiinanik Nunatta iluani assartuinermut akinik appaavoq.
Royal Arctic Linep umiatsianik, biilinik sanaartornermilu maskiinanik Nunatta iluani assartuinermut akigititaminik appaasinnaanera Naalakkersuisunit oktoberip 13-iani 2020 akuersissutigineqarpoq. Tamannalu Nunatsinni inuussutissarsiutinik ingerlataqartunut taamatullu inuiaqatigiinnut kalaallinut iluaqutaassaaq.
Ineqarnermut Attaveqaqatigiinnermullu Naalakkersuisoq Karl Frederik Danielsen ima oqarpoq:
“Nuannaarutigeqisannik nalunaarutigissavaraRoyal Arctic Linep umiatsianik, biilinik sanaartornermilu maskiinanik Nunatta iluani assartuinermut akigititaminik appaasinnaanerminik qinnuteqaataa Naalakkersuisunit akuersissutigineqarmat. Tamakkuninnga assartuinermi akigititanik appaanerup sanaartornermik ingerlatallit sanaartornermi maskiinanik assartuisitsiniarnerannut iluaqutaassaaq, inuillu aammalu inuussutissarsiornermik ingerlatallit biilinik umiatsianillu eqaannerusumik assartortitsiniarneranni iluaqutaassalluni. Naalakkersuisut neriuutigaat periarfissaq una innuttaasunit atorluarneqarumaartoq”.
Sanaartornermi maskiinanik assartuinermut tunngatillugu sanaartornerup iluani suliffeqarfiit illoqarfigisamik avataani suliassanut neqerooruteqarsinnaalissapput, tamannalu unammilleqatigiinnikkut akinik pitsaanerusunik kinguneqarsinnaavoq, sanaartortitsisumut inuiaqatigiinnullu iluaqutaasussamik. Assersuutigalugulu taaneqarsinnaavoq assaassuteeqqap Upernavimmit Innaarsunnut assartorneqarnera 11.085,60 koruuninut akikillissammat, siornatigut 23.778,35 koruuneqaraluarluni, kussiuutillu anginerusup assersuutigalugu Qaqortumit Uummannamut assartorneqarnera 54.711,50 koruuninut akikillissaaq siornatigut 121.674,66 koruuneqaraluarluni.
Inuussutissarsiutinik ingerlataqartut innuttaasullu ataasiakkaat umiatsianik biilinillu assartuinermut akit apparnerat aamma nuannaarutigisinnaavaat, umiatsiammi mikinerusup umiatsiaaqqalluunniit assersuutigalugu Qaqortumit Maniitsumut assartorneqarneranut akia 6.057,45 koruuneqalissaaq siornatigut 10.100,80 koruuneqaraluarluni, biilillu anginerusup meterit sisamat angullugit portussuseqartup Nuummit Ilulissanut assartorneqarnera 11.707,00 koruuninut akikillissaaq siornatigut 19.314,99 koruuneqaraluarluni. Assartuinermut akit nutaat nittartakkatsinni aamma takuneqarsinnaapput
https://www.ral.dk/media/1031777/hurtigtarif_okt2020.pdf
Assartukkanut qulaani taaneqartunut akitigut appaaneq oktobarip 15-iani 2020-mi atuutilissaaq 2022-llu naanissaata tungaanut atuukkallassalluni.
Royal Arctic Linep BAF/CAF-imut tapiliuttagaq, uuliamut aningaasallu nalinganut tapi, ukioq manna siusinnerusukkut 33 millionit koruunit nalinginut apparpaa, 2015-illu upernaavata kingorna akigititaminik qaffaasimanani.
Paasissutissat amerlanerusut CCO Lars Borris Pedersenimut oqarasuaatikkut 55 14 13-imut imaluunniit emailikkut LBP@ral.gl –imut attaveqarluni pissarsiarineqarsinnaapput.