Malik Arctica Ittoqqortoormiit tungaannut aallaqqereerpoq

Malik Arctica maanna Reykjavikimiit aallareerpoq Ittoqqortoormiit tungaannut ingerlaarluni.

Sikoqarnerata ajornartinngippagu Malik Arctica Ittoqqortoormiinut tikissaaq oktobarip 21-anni nal. 10:00.
Malik Arctica maannakkorpiaq ukiuuneranut peqqumaatissanik Ittoqqortoormiinut Nerlerit Inaannullu assartorpoq. Usini oktobarip sisamaanni siullermik apuunniaraluarpai, arlaleriarlunili iluatsinngitsumik misilereerluni orseriartorluni namminerlu peqqumaatissaminik nutaanik aallerluni Reykjavikimut aallarpoq. Angallaviup sikoqassusia ukioq manna 2015-imisulli ippoq. Ukiuni kingulliunerusuni 2015-imisulli sikoqartigisimanngilaq. 

Tunumut Avannaanullu ukiuuneranut peqqumaatissat apuunniarnerat maanna ingerlanneqaleruttorpoq.
Royal Arctic Line, KNI suleqatigalugu, Kalaallit Nunaanni tamarmi illoqarfinnut nunaqarfinnullu sikusartumiittunut ukiuunerani peqqumaatissanik ukiut tamaasa assartuisarpoq. Piffiit ilaanni peqqumaatissat ukiup affaanut atugassaasarput, taamaattumik peqqumaatissat ukiulivinnginnerani apuunneqarnissaat Royal Arctic Linemut pingaaruteqarluinnarpoq. Tamanna ilaanni ajornakusoortarpoq, sikup, silap anorillu aalajangersinnaasarmagu illoqarfiit, nunaqarfiit talittarfiillu ilumut tikinneqarsinnaasarnersut.