Anorersuarsuarnerani Tukuma Arctica pituutaarsimavoq

Savalimmiuni sakkortuumik anorersuarnerata kinguneranik Tukuma Arcticap, Torshavnimi tulaqqasup, pituutai kittorarsimapput, umiarsuarlu umiarsualivimmi sannikarluni inississimavoq.

Umiarsuup inuttaasa umiarsuaq ajoqusersimanersoq misissuleruttorpaat. Savalimmiuni anori Nunatta nalunaaqutaa malillugu aqagu ullaakkut atorsarussangatinneqarpoq, tassanilu umiarsuup ajoqusersimasinnaanera aatsaat iluamik paasineqarsinnaassaaq.

Inunnik ajoqusertoqanngilaq, uuliamillu aniasoqarneranik pasinartoqarani. Tukuma Arctica Århusip tungaanut ingerlasussaavoq pilersaarutillu malillugit arfininngornermi ullaakkut Torshavnimiit aallartussaagaluarluni.