Akiliutit apparneqarput

Usinut nillataartitanut/qerisunut tamalaanut Reykjavikimi nassiussalerinermut akiliut Royal Arctic Linep apparpaa.

Nunatta Islandillu akornanni assartuinermut aningaasartuutit tamarmiusut appasinnerulernissaat sivisuumik kissaatigineqarpoq, pingaartumik niuertarfiutillit tungaannit.

Usinut nillataartitanut/qerisunut tamalaanut nassiussalerinermut akit nutaat taamaalillutik Aalborgimi akigitinneqartut assigilerpaat. Akit Royal Arctic Linep assartuinermi akinut allattorsimaffiani takuneqarsinnaapput, uani: Hurtigtarif

Royal Arctic Line ingerlaavartumik pitsanngorsaalluni sulissuteqarpoq taamaalillunilu aamma akinik pitsaanerusunik neqerooruteqarsinnaalerluni. Assersuutigalugu qaammat kingulleq (oktobarimi) Reykjavikimi nillataartitanut/qerisunut containerinut ilivitsunut nassiussalerinermut akigitinneqartoq apparparput, assartuineq tamarmiusoq akikinnerulersillugu. Tamanna biilinut, umiatsianut sanaartornermilu maskiinanut aamma atuuppoq, Nunatta iluani assartuinermut akigitinneqartut affaannanngortinneqarmata.

Akinik appaanitta sullitatsinnit ilassilluarneqarnissaa neriuutigaarput, aamma umiarsualivinni nutaani allani akinik nutaanik piffissap sivisunngitsup iluani saqqummiussisinnaanissarput sulissutigaarput.