Royal Arctic Linep kraanii innaallagiatortut

Nuummi umiarsualivimmi Qeqertaniitumi Royal Arctic Line ingerlattakkanik kivittaassuaateqarpoq kraninik marlunnik. Ullumikkut atugaapput, kisianni aamma ukiup ingerlanerani Eimskipimik ingerlaaqateqalernissami umiarsuit pingasut, paarlaattarlutik Nuummut tikkittartussat, suliarinissaannut kranit taakku pisariaqavipput. Tukuma Arctica, Dettifos aamma Brúarfos kraneqanngillat, Royal Arctic Linep umiarsuaataasa peqarnerattut.

Maanna kranersuaq ataaseq, ulluinnarni ”Kujalleq”, uuliatorunnaarluni kallerup innitortunngorpoq. Taamalu naatsorsuinerit malillugit Royal Arctic Linep, Kalaallit Nunaatalu, CO2-mik aniatitsinera ukiumut 169 tonsinik annikillisillugu. Krani ”Avannarleq” aamma kallerup innitortunngortinneqassaaq, qaammatialunnguit qaangiuppata kaabelit imusarfiata atortussamaataa tikeriarpat.

-  Ullumikkut “Kujalleq” atortillugu iluaqutissaqarpoq, tassa dieselitortumiit kallerup innitortoq sukkanermik aallartittarpoq, aamma motorip dieselitortup atortussamaataanut sipaartarpugut, Immikkoortortaqarfimmi umiarsualiviup pisortaa Daniel Danielsen, Royal Arctic Line, oqarpoq.

Nuummi quersuarni Royal Arctic Linep trucksiutai innaallagiamoortuupput, atortullu allat kallerup innitortunngortinnissaat umiarsuaatileqatigiiffiup nalilersortarpaa.

Kraninik ingerlatitsisut terminalimi suleqatimisulli coronap atuuffiata nalaani suleqatigiiaakkuutaarlutik avinnikuupput, suleqatigiiaallu sinneri suliffimmi angerlarsimaffimmiluunniit naapinneq ajorlugit, soorlu aamma umiarsuarni inuttat umiarsualivimmilu sulisut imminnut qanilleqqusaanngitsut. Ilaatigut taamaaliornikkut Royal Arctic Linep Kalaallit Nunaannik pilersuissalluni suliassaata nappaammit sunnerneqannginnissaa qulakkeerniarparput.