Royal Arctic Line piareersimavoq

Royal Arctic Line inuiaqatigiinnut pingaaruteqarluinnartumik pilersuisuuvoq, taamaattumillu COVID-19-ip tunillaassornera malittareqqissaarneqarpoq.

Royal Arctic Line upalungaarsimatitanik pilersitsivoq, taakkulu ingerlaavartumik naapeqatigiittarput COVID-19-imullu tunngatillugu pisut nalilersuiffigisarlugit.

Sulisut akornanni COVID-19-imik tunillatsittoqaraluarpat, imaluunniit tunillanneqaratarsinnaaneq pissutigalugu angerlarsimaqqusaagallartoqarpat upalungaarsimatitat aamma naapittussaapput.

Pilersuinerup isumannaassusia

Suliffeqarfiup sulisuisa ilaat arlalilluunniit angerlarsimaannaqqusaassagaluarpata imaluunniit COVID-19-imik tunillanneqaraluarpata, suliffeqarfiup tunniuttagaata pingaarnerit ingerlaannarnissaat qulakkeerniarlugu Royal Arctic Linemi upalungaarsimatitat pilersaarusiorput.

Royal Arctic Linep ingerlataata pingaarnerit kiisalu ingerlatat sulisullu pingaarutilimmik inissisimasut inuillu tunillanneqarnissamut qaninnerusut illersornissaat eqqumaffigivagut. Sullissisussaatitaanitta pilersuinissamullu pisussaaffitta naammassisinnaajuaannarnissaat pillugit taamaaliorpugut.

Sulisut

Royal Arctic Linep iluani pinaveersaartitsinissamut suliniuteqarpugut, tunillaassuuttoqaratarsinnaanera annikillisarniarlugu, ilaatigut allagartanik nivinngartuinikkut, tunillannartuiaatinik agguaassinikkut, minnerunngitsumillu aqutsisut tamarmik kajumissaarneqarlutik sulisuminnik pisut pillugit oqaloqateqaqqullugit.

Royal Arctic Linep sulisuni suliffeqarfiup attaveqaqatigiittarfiatigut ingerlaavartumik ilisimatittarpai, oqartussallu paasissutissiissutigisaannut attuumassuteqartunut attavissat saqqummiuttarlugit.

Upalungaarsimanerup aaqqissugaanera

Royal Arctic Linep upalungaarsimanermut pilersaarutaa ingerlaavartumik misilittarneqartarpoq, upalungaarsimaniarnermilu ilimaginngisamik pisoqarsinnaanera aamma piareersimaffigineqarluni, soorlu assersuutigalugu coronavirusi nunatsinnut anngutissagaluarpat qanoq aaqqissuussissanerluta, suliassallu suut angerlarsimaffimmit isumagineqarsinnaanersut, sorliillu isumagineqarsinnaannginnersut pillugit.

Tuniluuttoqaratarsinnaaneranut nunatsinniillu nunatsinnut pilersuinerup qulakkeernissaanut piareersarsimalluarluta maannamut misigisimavugut, aamma sapaatit akunnerini aggersuni pisut ingasannerulissagaluarpata.