Nanoq Arctica ullumi Royal Arctic Linemut tunniunneqarpoq

Tasiilami pajuttaatissaq nutaaq Nanoq Arctica Gdanskimi Polenimiittumi umiarsualiorfimmit ullumi pingasunngornermi juunip 17-ianni 2020 Royal Arctic Linemut tunniunneqarpoq.

Royal Arctic Linep Islandimilu Eimskipip ingerlaaqatigiinneranni immikkoortut aappaat naggataallu aallartippat, tassa Eimskipip umiarsuaataasa aappaat Brúarfoss naammasseriarpat Skandinaviallu, Savalimmiut, Islandip Nunattalu akornanni ingerlaarneq nalinginnaasoq aallarteriarpat, umiarsuaq 74 meterisut takitigisoq containerinillu 108-nik usisinnaasoq oktoberip naalerneraniit Tasiilap Islandillu akornanni ingerlaalissaaq.

Nanoq Arctica iluaqutigalugu Tasiilap aasaanerani tikinneqartarnera 50 procentimik qaffassaaq. Aamma Royal Arctic Linep Eimskipimik suleqateqarneratigut assartuinikkut attaveqaatai Tasiilamut Nanoq Arctica aqqutigalugu attavilerneqassapput.

Tunumi kiffartuussinerup pitsanngorsaavigineqarnissaanik kissaat taamatut aaqqiissuteqarnermut tunngaviuvoq.

- Tasiilaq aasaanerani 50 procentimik tikinneqarnerusalerpat   Tunumi inuiaqatigiinnut tamanna iluaqutaassaaq, Royal Arctic Linemi umiarsuarnut ingerlatsivimmi pisortaq Anders Bay Larsen oqarpoq.

Nanoq Arctica aallaqqaammut Nuup Nunattalu kujataata akornanni pajuttutut atorneqassaaq. Taamaattoq umiarsualivik toqqammavigisassani Tasiilamiittoq juulip 10-nganni tikissavaa – atserneqassagami. Taamaalinerani illoqarfimmi innuttaasut umiarsualivimmi kaffillerfigineqassapput – nakkutigisaasumik, COVID 19’ip atuunnera eqqarsaatigalugu.

COVID-19 aamma pissutaarpiarpoq Royal Arctic Linep pisortaanerata Verner Hammekenip umiarsuarnullu ingerlatsivimmi pisortap Anders Bay Larsenip tunniussinermi video-kkut peqataanerannut. Aamma pappialat pisariaqartut tamarmik, aningaaserivimmut, umiarsualiorfimmut Danmarkimilu umiarsuit pillugit qullersaqarfimmut Søfartsstyrelsimut apuuttussat qarasaasiaqarnikkut periarfissat atorlugit isumagineqarput.

Umiarsuup naalagaa Eydun Simonsen aamma Aserfallatsaaliinermut pisortaq Poul Nymark Christensen ullumi Nanoq Arcticamik Polenimi tigusisuupput.