Imarsiortut Ulluat – Pinngitsoorneqarsinnaanngitsut Ulluat
Royal Arctic Linemi umiartortut sulisuupput pingaaruteqarluinnartut, Nunatsinni pinngitsoorsinnaanngisagut. COVID-19’ip nalaani pinngitsoorsinnaanngisatsinnik, soorlu nerisassanik nakorsaatinillu pilersortuarpaatigut, coronalli ajornartorsiortitsinerata nassataanik umiartortut suliffeqarnikkut atugarliortitaapput, umiarsuup taleqqanerani nalornartorsiornerit nioqqusaannginnerillu, inuttat paarlaassinnaannginnerat nunamiittussaanerullu nalaani angerlarsinnaannginnerit pissutigalugit.
Ullumi ulloq tassaavoq FNip imarsiortunut ullorititaa, FNillu ataani nunat tamalaat imarsiornermik suliallit kattuffiata International Maritime Organizationip IMOp ilaasortaminut kajumissaarutigaa nualluussuup nalaani umiartortortatik tapersersorlugit, ikiorlugit ajornannginnerusumillu angalasinnaaqqullugit nunaminni sulisutut pingaartutut akuereqqullugit. Sulisutut pingaarutilittut inissinnikkut assersuutigalugu inuttat paarlaattussaaneranni angerlarsimaffimmiit umiarsuarmut – utimullu – angalanerit pisariillisarneqarsinnaapput, COVID-19’ip siaruaatinnginnissaanut qanoq iliuusissat innersuussutillu atuuttut iluini.
Angallannikkut killilersuinerit pissutigalugit nunarsuarmi umiartortut tusindilikkaat qaammaterpassuarni angerlarsinnaasimanngillat qaqugulu tamanna pisinnaassanersoq ilisimanngilaat. ”Umiartortut sulisut pingaartut” pillugit suliniuteqarneq taamaalilluni nualluussuup nalaani umiartortut sulinerannik paasisitsiniaaneruvoq qujaniuteqarfiullunilu.
Nunarsuarmi niueqatigiinnermi umiartortut suliaannik pinngitsoorsinnaanngisatsinnik suliaqarnerat ingerlaannaqqullugu paasisitsiniaanermi pissusissamisoortumik tamanit ataqqineqarnissaat kajumissaarutigineqarpoq.
”Maani Royal Arctic Linemi umiartortortagut qujassutissaqarfigeqaagut. Kalaallit Nunaata pilersorneqarnera nalinginnaasutut ingerlaqqullugu ilaasa umiarsuarmiinnertik sivitsunngikkunikku angalanermut tullermut ilaaqqinnissartik akuerisimavaat, ilaasalu nunami sulinngiffeqarnissartik sivikillisimallugu. Umiarsuarmi mattusimanerit suleriaatsinillu allannguinerit, tamakku tamaasa aqqusaarsimavaat inuiaqatigiit ingerlarngat allanngorpallaannginniassammat. Taamaattumik uagut inuiaqatigiit Kalaallit Nunaanniittugut coronap ajornartorsiortitsinerata nalaani umiartortortatta sulinerujussuat qujassutigisariaqarparput”, Royal Arctic Linemi umiarsuarnik ingerlatsinermut pisortaq Anders Bay Larsen oqarpoq.
IMO’p pisortaa Kitack Lim:
”Nualluussuup nalaaniinnaanngitsoq tamatigulli umiartortut tamarmik nunarsuarmi naalakkersuisuminnit sukkasuumik inuttut oqilisaaffigineqarnissartik pisariaqartippaat – ikiuinissarlu pissusissamisuuginnassaaq”.
Kitack Lim Sydkoreameersoq siorna Kalaallit Nunaanniippoq Issittumi immakkut assartuineq pillugu isumasioqatigiinneq peqataaffigiartorlugu, Namminersorlutik Oqartussanit Royal Arctic Linemillu qaaqquneqarluni.
