Nanoq Arctica Tasiilap illoqarfittut ikinngutigisaani angerlarsimaffittut umiarsualiveqarpoq

Royal Arctic Linep umiarsuaata nutaajunersaat Tasiilami sapaatit akunneranni uani atserneqartussaq, Nanoq Arctica, Gentoftep kommuniani Tasiilap illoqarfittut ikinngutigisaani Skovshovedimi angerlarsimaffittut umiarsualiveqarpoq.

Imarsiornermut suliassaqarfik Nunatsinnit suli akisussaaffigineqanngilaq, taamaammat Erfalasorput atorlugu imaaliallaannarluni nunat assigiinngitsut akornanni aalajangersimasumik ingerlaartoqarsinnaanngilaq, nunanilu tamalaani isumaqatigiissutit naapertorlugit erfalasoq akuerisaasoq atorneqartussaammat. Taamaammat Nanoq Arctica nunat tamalaat imartaasigut angalasussaq danskit erfalasuat atorlugu angalavoq. Umiarsuit imartatsinniinnaq angalasut kalaallit erfalasuannik erfalasoqarnissaat Royal Arctic Linep pingaartittupilussuuaa, ukiunilu makkunani allanngortiterisoqarpoq. Inuttalersueriaatsit assigiinngitsut atorneqarmata akileraartarnermut tunngasut akuersissutillu naammassineqaqqaartussaapput, tamatumalu aaqqiissuteqarfiginissaa umiarsuaatileqatigiiffimmit sulissutigineqarpoq.

Nanoq Arctica Tasiilami pigisaanilu angalasussaammat Gentoftelu Tasiilap illoqarfittut ikinngutigimmagu Skovshoved Havn toqqarneqarpoq. 

Nanoq Arctica Kujataani pajuttaatitut atoreeruni ukiap naajartulernerani Tunuliassaaq Tasiilamilu umiarsualivik aalajangersimasumik umiarsualivigilerlugu, umiarsuarlu Brúarfoss VSA-mut ilanngutsinneqarpat (Vessel Sharing Agreement) Royal Arctic Linep Eimskipillu ingerlaaqatigiinnerat tamakkiisumik atulissaaq.

Gentoftep Kommuniani borgmesteri, Hans Toft, pisussaq pillugu ima oqarpoq:

”Gentoftep Kommuniata illoqarfittut ikinngutigisaata Tasiilap nioqqutissat avammut nassiussornissaannut ajornannginnerulersitsisussamik umiarsuartaaqqinnera, tamatumunngalu peqatigitillugu illoqarfiup nunaqarfiillu pilersorneqarnerisa qulakkeernissaanik annertunerulersitsisoqarnera nuannaarutissaavoq. Umiarsuullu Gentoftemi Skovshovedimi angerlarsimaffittut umiarsualiveqarnissaa Gentoftep Kommuniata Tasiilallu qanittumik atassuteqarnerannik naqissuseeqataassaaq.”

Borgmesteri Charlotte Ludvigsen, Kommuneqarfik Sermersooq:

”Royal Arctic Line Tasiilarlu pilluaqqorusuppakka. Tasiilami angallannikkut pissutsit pitsaanerulersinneqarnissaat Sermersuup tungaanit qangali kissaatigisimavarput, taamaammat Royal Arctic Linep Nanoq Arcticamik umiarsualiinera nuannaarutigeqaara. Nutaanik periarfissaqalerneratigut Tasiilaq ukiumut akulikinnerusumik tikinneqartalissaaq nunarsuullu sinneranit nassiussat sukkanerusumik apuunneqartalissallutik. Tamannalu Tasiilami inuussutissarsiuteqartunut innuttaasunullu periarfissanik nutaarpassuarnik ammaassissaaq. Aamma Nanoq Arcticap Tasiilaq illoqarfittut ikinngutigisaanut Gentoftemut qaninnerulersissavaa, tamannalu isumaqarpunga iliuusiusoq kusanartoq”.

Nanoq Arctica Tasiilami umiarsualivimmi nalliuttorsiutigineqarluni tallimanngorpat juulip qulingani nal. 14.00 atserneqassaaq.