Dettifoss Nuummut tikippoq

Eimskipip umiarsuaa nutaarsuaq Dettifoss tallimanngornermi juulip 17-iani 2020 seqinnarissuup ataani Nuummut siullerpaamik tikippoq.

Dettifoss Eimskipip umiarsuaata nutaat TEU-nik 2.150-inik usisinnaasut marluusut aapparaat, Royal Arctic Linellu umiarsuaa Tukuma Arctica peqatigalugu ingerlaaqatigiinnissamut atugassatut sananeqarluni.

Ingerlaaqatigiinnermi Royal Arctic Line Eimskipip nunarsuaq tamakkerlugu attaveqarfigisaanut ilaalerpoq, nunatsinnut niuernikkut periarfissanik ammaassisoqarluni kiisalu Islandip Nunattalu akornanni sapaatit akunnikkuutaartumik attaveqalernerani nunat taakku marluk akornanni nunarsuullu sinneranut niueqateqarnerup annertunerulersinnissaanut periarfissaqartitsisoqalerluni.

Royal Arctic Linep Eimskipimik ingerlaaqateqalernera aamma nunani avannarlerni killerni, Nunatsinnut, Islandimut Savalimmiunullu, imaatigut assartuineq pisariillisarneqarpoq, nunarsuarmi sumiiffinni allani atugassarititaasut assingalugit ingerlatsisoqarsinnaalissalluni, sullissinikkut unammilleqatigiittoqarluni umiarsuarnilu inissaq akisooq avitseqatigiissutigineqassalluni.

Tamannalu Royal Arctic Linep Eimskipillu aningaasartuutaannut avatangiisinullu sunniutaannut annikillisaataassaaq.

Royal Arctic Linep Eimskipillu ingerlaaqatigiinnerat juulip qulingani pisortatigoortumik aallartippoq, Tukuma Arctica immikkoortoq siulleq aallarnerlugu Aalborgimit ulloq taanna aallarmat. Ingerlaaqatigiinneq marlunnik immikkoortulerlugu aallartisarneqarpoq Eimskipip umiarsuaata aappaata Brúarfossip Kinami umiarsualiorfimmi sananeqarnera kinguaattooqqaffiummat. Ingerlaaqatigiinnerup immikkoortuata aappaa kingullerlu oktobarip 28-ani 2020-mi aallartinneqassaaq, Brúarfossip Danmarkimit Nuummut ulloq taanna aallarnissaa naatsorsuutigineqarmat. Umiarsuit pingasut taamaalillutik ingerlaaqatigiilissapput Royal Arctic Linellu Eimskipimik ingerlaaqateqarnera tamakkiisumik atulerluni.