Dettifoss Aalborgimit aallarpoq

Eimskipip Royal Arctic Linemik ingerlaaqateqarnermini umiarsuaata aappaa, Dettifoss, VSA-mi angalanissamut pilersaarummut ilanngutsinneqarluni Aalborgimit ullumikkut aallarpoq. 

Eimskipip umiarsuaata marluusut aappaata, Brúarfossip, Kinami umiarsualiorfimmi sananeqarnera kinguaattooqqaffiummat ingerlaaqatigiinnerup aallartisarnera immikkoortunut marlunnut avinneqarpoq. Tukuma Arcticap VSA-mi angalanissamut pilersaarut juunip qulingani atulermagu immikkoortoq siulleq aallarnerneqarpoq, Eimskipillu umiarsuaa Dettifoss maanna tassunga ilanngutsinneqarluni.

Royal Arctic Linep umiarsuaa imarpikkoortaat Mary Arctica, ingerlaaqatigiinnerup immikkoortuata aappaata kingulliullu oktobarip 28-ani 2020-mi aallartinnissaata tungaanut, umiarsuit pingajuattut atorneqarpoq, tamatumalu kingorna Brúarfossip Danmarkimit Helsingborgimut, Frederikstadimut, Aarhusimut, Torshavnimut, Reykjavikimut Nuummullu aallarnissaa naatsorsuutigineqarluni. Umiarsuit taamaalillutik ingerlaaqatigiilissapput Royal Arctic Linellu Eimskipimik ingerlaaqateqarnera tamakkiisumik atulissalluni.

*VSA: Vessel Sharing Agreement.