HFO-mut inerteqqut taperserparput
Royal Arctic Linep avatangiisitsinnik eriagisaqarnera qularnartoqanngilaq. Nutarterinitsinni tamani, 2020-mi 2021-milu umiarsuartaassatsinnut aningaasaliissutini Eimskipimillu ingerlaaqateqalernissatsinni, avatangiisitsinnik, eqqatsinnik minnerunngitsumillu inuiaqatigiinnik mianerinninnerput tunngaviujuarpoq.
Taamaattumik imarsiorneq pillugu kattuffissuup IMO’p ataani ataatsimiittartoqatigiiffiup PPR’ip uuliap kinertup (HFO) Issittumi 2024-miit inerteqqutiginissaanut IMO'p akuerisassaatut siunnersuutaanik sapaatip akunnerani kingullermi akuersinera tapersersorparput. Umiarsuarnut isumannaallisakkanik orsussamaasivilinnut, soorlu Royal Arctic Linep umiarsuaataanut, inerteqqut 2029-mi julimi atuutilissaaq.
Umiarsuaatileqatigiiffiup umiarsuaataa nutaanerpaaq Tukuma Arctica silaannaap mingutsinnera millisinniarlugu putsumut saliissummik sunniuteqarluartumik atortuligaavoq, sinnikunillu imaanut eqqaannginnissaq siunertaralugu saliissut taanna ”matoqqasumik” akuiaasarpoq. Sinerissami umiarsuaatitsinnik, HFO-mik atuineq ajortunik, nutarterineq ingerlapparput. Taamaalillutik umiarsuaatitta 11-t ilaasa 5-t kisimik ilaannakortumik HFO atorpaat. Atuisunilu uulia kinertoq tankini immikkut nakkutigisaasuni immikkoortitanilu pigineqartarpoq. Umiarsuup uuliamik kinertumik useqartup mikinerusup usigisartagaata 1 procentiata missinga kisimi umiarsuaatitsinni atorneqarlunilu nassarneqartarpoq. Upernaaru Island suleqatigalugu ingerlaartalerutta umiarsuit HFO-mik atortartut 5-niit amerlanerpaamik 4-nut ikileriassapput – eqqarsaatigineqarsinnaavortaaq nunarsuarmi umiarsuit HFO-tortut suli 30.000-init amerlanerummata.
Taamaalilluni uuliamik mingutitsisinnaaneq IMO’p inerteqqutiliussaani annerusumik annilaanngatigineqarsinnaavoq. Umiarsuaatigut sikulikkoorsinnaanissaminnut immikkut sanaajupput, umiarsuillu iluini tankit avissaaqqapput, immikkullu ittumik ninngusuunngorsagaallutik, issittup imaani ukiuni 245-ni ilisimaaralugu angallavigisatsinni atugassatut tulluarsagaallutik.
Kalaallit Nunaata ineriartornera patajaallisarlugu ingerlatsinitta aningaasatigut sapinngisamik pitsaanerpaamik angusaqarfiunissaa inuiaqatigiinnut akisussaaffigaarput. 2029-miit HFO-p inerteqqutigineqalernissaata taamaalilluni umiarsuaatileqatigiiffiup umiarsuartigut ingerlaartarfitsigullu pissusaa ilalersorpaa, ukiullu tulliini 9-ni aningaasatigut akisussaassulittut allannguinissatsinnut piffissaqartilluta.
Avatangiisit pitsaanerusut ornikkiartorlugit sulinissaminut Royal Arctic Line qilanaarpoq. Suliassaq pingaartuuvoq. Ingerlaaqatigiinnissamik nunarsuarmilu imaatigut assartuinermut attuumassutillit ilannguffiginissaannut umiarsuaatileqatigiiffiup sulissutigisaa Kalaallit Nunaata pilersorneqarnerani nunattalu aalisakkanik avammut nioqquteqarnerani nunarsuup tunniussinnaasaata piinik atuilluarnerunermik kinguneqassaaq.
Assimi takuneqarsinnaapput IMO’p generalsekretæria Kitack Lim Royal Arctic Line-llu pisortaanera Verner Hammeken 2019-imi Ilulissani naapeqatigiinnermi.