Royal Arctic Line: Avammut nioqquteqartut periarfissaat siornatigornit amerlanerujussuupput

Nunatta nunarsuaq tamakkerlugu assartuinikkut attaveqaatinut ilanngunnissaanik Royal Arctic Linep periaasissatut pilersaarutaa siornatigut takuneqarsimanngitsunik periarfissaqalersitsivoq. Periarfissallu taakku Nunarput ajornannginnerusumik niueqatigineqarsinnaanngortinniarlugu ineriartorteqqinneqarsinnaajuaannarput.  

Kujammut avannamullu maanna ingerlaartarnitsinni Sverigep, Danmarkip, Savalimmiut, Islandip Nunattalu akornanni aalajangersimasunik attaveqarpugut. Sapaatit akunneri tamaasa. Ukioq kaajallallugu. Tamanna siornatigut takusimanngilarput. 

Taamaattumillu avammut nioqqutigineqartut EU-mut nunanullu EU-mut ilaasortaanngitsunut apuunneqarsinnaapput nuna EU-mut ilaasortaasoq aqqutigeqqaanngikkaluarlugu. Nunatsinnit Island aqqutigalugu UK-imut aqqut tamatumunnga assersuutissaavoq.

Tamannalu Nunatsinni tunisassiat Danmarkimit danskit tunisassiaattut maanna tuniniarneqartarnerannut naleqqiullugu Nunatta nunanut pisisartunut toqqaannartumik tuniniaasinnaaneranut annertunerusunik periarfissaqalersitsivoq. Tunisassiat amerlanertigut allatut suliareqqinnagit siammartigassatut containerinut poortorneqartarput. Avammut toqqaannartumik niuerneq pisariillisaanerunissamut periarfissiissaaq Nunarpullu toqqaannarnerusumik nittarsaanneqassalluni, aamma akitsuutinik appasinnerusunik ilaatigooriarluni kinguneqarsinnaavoq iluanaaruteqarnerunissamullu periarfissaqarnerulersitsilluni, allaallumi immaqa suliffiit ilaasa Nunatsinnut nuunneqarnissaannut periarfissaqalersitsisinnaavoq. 

Ineriartortitsineq Nunatta avammut tunisartagaanik siunissami nalitunerulersitsinissamut periarfissagissaarnerulersitsisussaq aatsaat aallarteruttorpoq. Silarsuarmi allanngorartuartumi niuernermi teknikkikkut periarfissat nutaat suli amerlapput aamma nutaarpassuarnik ilinniagassaqarpoq, avammut tunisassiortutsinnut aammali Royal Arctic Linemut. 

Ineriartortitsinermut tassunga ilaanerput tulluusimaarutigaarput ikorfartoqqinnissaanullu qanoq iliorsinnaanerluta misissortuassavarput, aamma sullitavut avammut tunisassiortut peqatigalugit periarfissat nutaat tamakkiisumik atorluarnissaat qilanaarivarput. 

Royal Arctic Line 

2021-01-16