Tukuma Arcticap tallimanngornermi apriilip 17-ianni atserneqarnissaanut qaaqqusissut
Royal Arctic Linep umiarsuaataa nutaaq Tukuma Arctica maanna Nuup tungaanut ingerlaarpoq tallimanngornermi ullaakkut nal. 7:00 tikissangatinneqarluni. Tukuma Arctica Kitsissut nalaanni nal.06:00 kinguninngua nuissangatinneqarpoq, tamaanngaanniillu Nuummut tikikkiartornera, taamalu Kalaallit Nunaanni umiarsualivisseqqaarnera, malinnaaffigineqarsinnaavoq. Tamanna Royal Arctic Linep Facebookimi qupperneratigut toqqaannartumik aallakaatinneqassaaq.
Tukuma Arctica ulloq taanna nal. 11:30 atserneqassaaq. Imarpikkoortaatitaatta atserneqarnissaa umiarsualivimmi tamanut ammasumik kateritsitsinikkut pissasoq pilersaarutaaqqaarsimagaluarpoq, inuilli killilimmik amerlassusillit katersuussinnaatitaanerannik pisortat innersuussutaat tunngavigalugit pilersaarutit annertuumik allanngortittariaqarsimapput.
Taamaalilluni inuit ikittunnguit kisimik atsiinermi peqataasussanngorput, taarsiullugulu pisumit Facebookikkut nal. 11:30-miit toqqaannartumik aallakaatitsissaagut.
Kalaallit Nunaanniittut tamaasa avataanilu soqutiginnittut tallimanngorpat Tukuma Arcticap atserneqarneranut qaaqqorusuppagut. Umiarsuaatitsinnik atsiinialeraangatta nalinginnaasumik tamanut persuarsiornartumillu ingerlatsisarpugut, neriuppugullu sapinngisamik amerlasuut umiarsuaq inuttaalu pilluaqqujumaaraat siunissamilu ingerlalluarnissaanik kissaakkumaaraat. Atsiinerup kingorna erinarsoqatigiinnut taarsiullugu tamatta erinarsoqatigiissaagut, neriuppugullu sapinngisamik amerlasuut peqataajumaartut, upernaaq ilanngullugu tikilluaqqugutsigu.
Tukuma Arcticap atserneqarneranit Royal Arctic Linep Facebookiatigut toqqaannartumik aallakaatitsissaagut tallimanngornermi apriilip 17-ianni nal. 11:30.