Royal Arctic Line sivisuumik sillimanissamut piareeqqavoq

Royal Arctic Line inuiaqatigiinni pingaarutilimmik inissisimavoq ingerlaarnerlu qanorluunniit pisoqaraluarpat ingerlaannassaaq. Tassa.

Coronap ajornartorsiortitsinerata ingerlarnga tunngavigalugu sivisuumik upalungaarsimanissarput naatsorsuutigaarput. Qaammaterpassuit, ilami ukioq sinnerlugu tamassuma atuunnissaa naatsorsuutigilereerparput. Qaffasinnerpaamiittumilli upalungaarsimajuaannartoqarsinnaanngilaq, taamaattumik ajornartoorneq immikkoortunut pingasunut agguataarsimavarput:

1)    Upalungaarsimaneq appasissoq (sulili upalungaarsimanerusoq)

2)    Upalungaarsimaneq sakkortusisaq

3)    Upalungaarsimaneq immikkut ittumik sakkortusisaq

Taakku pingasut iluini angerlarsimalluni sulinermi, inimeeqatigiilluni ataatsimeeqatigiittarnerni, sutortarfimmiittarnermi, hold-inut avinneqartarnermi, ullup suliffiup nikerartunngortinneqarnerani, sullissat inimiittut aaliangersimasumik amerlassuseqartinneqarneranni, sullissanullu imaluunniit pilersuisunut pulaarnermi malittarisassat nassuiaatissaqartinneqarput. Umiarsuarnut tunngatillugu umiarsualivinni usingiaasarnermi usilersuisarnermilu pisariaqanngitsumik qanillinani umiarsuit suleqatigisarnissaannik periusissanut nassuiaatissaqarportaaq, pingaartumik imarpikkoortaatinut, taakkumi tunillaassuisoqarfimminngaanneersuupput. Umiarsualivinnut umiarsuarnullu tamanut upalungaarsimanerup normu sorliup atuutsinneqarnissaa Royal Arctic Linep upalungaarsimasuutitaasa aaliangissavaat. 

Arfininngorpat ullaakkumiit Kalaallit Nunaanni, umiarsuarnilu sinersortuni nunaqarfiliartaatinilu upalungaarsimaneq normu 1 atuutissaaq. Umiarsuarnut Danmarkiminngaanneersunut upalungaarsimaneq normu 2 suli atuuppoq. Ulluni makkunani Danmarkimi upalungaarsimanerup normu 1-mut pisinnaanngornissaa nalilersortuarparput, Danmarkimi majip qulingata tungaanut pissutsit pillugit nalunaarutaasartut tunngavigisarlutigit.

Royal Arctic Linemi sulisut amerlasuut coronap ajornartorsiortitsineranit eqqugaapput. Pissutsit atukkatta paasilluarnissaat, suleqatitsinnilu arlariiaat immikkut ittumik sunnigaammata paasissallutigu tamatsinnut pingaaruteqarpoq. Umiarsuarni Danmarkimut uteqattaartuni inuttat immikkut ittumik eqqugaapput, tunillaasinnaasutut Kalaallit Nunaanni isigineqarnertik pissutigalugu. Allaammi suleqatitsinni marlunnik COVID-19’imik napparsimasoqarsimavugut, taakkulu imarpikkoortaatinut appakaassimasimapput. Taamaattumik umiarsuarni taakkunaniittut Kalaallit Nunaanni nunamut ikaarsinnaatitaanngilluinnarput. Taakkununnga sulineq oqimaannerusutut ilersarpoq.

Inuit tamatta assigiinngilagut. Ajornartorsiutinik naammattoorsinitsinni tamatta assigiinngitsumik qisuariaateqartarpugut. Coronap ajornartorsiutaanerata annertunera atukkagullu pillugit erseqqissaassuteqartarnerit pissutsit atukkatta qanoq ittuunerannik tamatta paasinninnissatsinnut iluaqutaassapput. Aatsaat immitsinnut ikioqatigiikkutta immitsinnullu paarigutta Royal Arctic Linep Kalaallit Nunaannik sapinngisamik pitsaanerpaamik ikiuisinnaanera qulakkiissavarput. Taamaattumik paasissutissiisarneq aallupparput eqqortumillu aaliangernissamut immitsinnut tapersersorluta, sulisut toqqissisimappata pilersuineq pitsaanerpaamik qulakkeerneqarsinnaammat.

Umiarsuit ingerlaarnerat unissanngilaq. Royal Arctic Linemi sulisut sulinerat tulluusimaarutigaarput, imaatigullu ingerlaarnerup sumorsuaq ingerlaannarnissaanik qulakkeerinnikkumallutik akisussaaffimmik tigusisut tulluusimaarutigalugit. Nalunngikkaluarparput coronap ajornartorsiortitsinera sivisoorsuusinnaasoq qaangiunnissaanullu aamma sivisusinnaasoq.