Suliareqqitassanngortitsineq aalajangiiffigineqarpoq

Royal Arctic Linep Eimskipillu suleqatigiinnissaannik Islandimi unammilleqatigiinnermut oqartussat akuersissuteqarnerannik Samskipip suliareqqitassanngortitsinera Islandimi naammagittaalliuteqartarfimmit itigartitsissutigineqarpoq. Royal Arctic Linep Eimskipillu ingerlaaqatigiittalernissaat taamaalilluni nalunarunnaarpoq.

Royal Arctic Linep Eimskipillu ingerlaaqatigiilernissaannut piareersaateqarnermut atatillugu ataqatigiissaariniarluni pilersaarutaareersumik ataatsimeeqatigiittoqarpoq. Ingerlaaqatigiinnerullu ukiup naanerani aallartittussatut pilersaarutigineqartup, umiarsuit nutaat tunniunneqarnissaasa kinguaattoorfiuneri pissutigalugit, 2020-mi ukiup sisamararterutaanut siullermut kinguartinneqarnissaa ataatsimiinnermi aalajangerneqarpoq.

Ingerlaaqatigiinnissatta kinguartittariaqarnera soorunami uggornarpoq, kiattulli anorersuata tyfonip kiarujussuarneralu pissutigalugit, umiarsuit Kinami Guangzhoumi sananeqarfigisaanni sulinermi atugassarititaasutigut annertuumik ajornakusoortitsisimapput. Tamatumunngalu peqatigitillugu teknikkikkut atortorissaarutit ilaannik ikkussuinerit naatsorsuutigisamit sivisunerunissaat aamma paasineqarluni, Royal Arctic Linemi Umiarsuarnik ingerlatsinermut immikkoortortaqarfimmi pisortaq, Anders Bay Larsen, taama oqarpoq.

Umiarsuit katillugit pingasut sananeqarput, ataaseq Royal Arctic Linemit pigineqarpoq marlullu Eimskipimit pigineqarlutik. Ingerlatsinermut tunngatillugu piareersaatigineqartut pilersaarutit malillugit ingerlaannassapput, aallartiffissallu ullussaa 2019-imi oktobarip naalernerani nalunaarutigisinnaassallugu illuatungeriit naatsorsuutigaat.  

Royal Arctic Line angalanissamik pilersaarutaagallartussaq pillugu sullitaminut ingerlatsinermut tunngasumik nutaarsiassiilluni piaartumik allagaqassaaq. Taanna ukiup sinneranut, kiisalu 2020-mi ukiup sisamararterutaanut siullermut atuutissaaq.