Ineriartorneq allatut ingerlatinniarneqarpoq

Suleqatigiissitaq Royal Greenland A/S-imit, Royal Arctic Line A/S-imit, Polar Seafood Greenland A/S-imit, Imarsiornermik Ilinniarfik/ Grønlands Maritime Center-imit, Kalaallit Nunaanni Sulisitsisunit aamma Ilinniartitaanermut Naalakkersuisoqarfimmit sinniisoqartitaq imarsiornermi ilinniartitaasarnerup nukkassarniarneqarnera pillugu suliniuteqalerput.   

Immami inuussutissarsiornermi aqumiut amerlanerit ilinniartinneqartarnissaannut umiarsuaatileqatigiinni politikkikkullu suliaqartut akornanni tamatumunnga soqutiginninnerujussuaq tassani peqqutaavoq. Ukiuni kingullerpaani pitsaap tungaanut ingerlasimasoqaraluaq suliffeqarfinnit paasineqarpoq ilinniartitaanermik ingerlatsiviit ulluni makkunani atuuttut suliassamik qaangiiniarnermi naammattumik ingerlatsisinnaanngitsut. Tassani aningaasaliiffigineqartarnerit ikilisarneqarsimanerat ilaatigut peqqutaavoq, aammali init ilinniartitsinerni attartukkatut nalitsinnullu naleqqutinngitsut atorneqartartut periarfissakinneri uani peqqutaaqataapput – taamaalillunilu ilinniartitaasinnaasut amerlassusiisa ikilineqarnerannut malitseqartitsillutik.  

Atukkat taamatut itsillugit aqumiunik nunatsinneersunik amigaateqarnerujussuup atuutereersup annertuseqqinneranik kinguneqartitsivivoq. Tamannalu ajornartorsiut Nunatta imarsiornermik aalisarnermillu ingerlataqartuusutut ilisimaneqarneranut tulluutinngilaq. Taamaattumik aqumiunik naammattunik immitsinnut pilersoqqajarsinnaanngilagut, ukiunilu tulliuttuni amerlasuuni avataanit tikisitanik sulisoqarnissamik suli pisariaqartitsissaagut. Kalaallit Nunaannili suliffeqarfiit imarsiornermik suliaqartut taamatut pissutsit ittut allanngortikkusuppaat, taamaaliornikkut siunissaq ungasissoq isigalugu aalisariuteqarnerup niuffagiuteqarnerullu iluani aqumiunik kalaaliusunik peqarnerulernissaq angorusullugu.  

Tamakku saniatigut tunisassiornerup iluanitunngaviusumik annertunerusumillu ilinniartitsinerunissamik, annertuumittaaq pisariaqartitsisoqarpoq, taamaaliornikkummi fabrikkini nioqqutissiortunik aqutsisunillu ilinniarsimanerusunik peqarnerulernissaq anguneqassammat – tassa angallatini nunamilu aalisakkanik tuniasaasiornerit eqaarsaatigalugit.  Nalinginnaasuuvuttaaq umiarsuarni maskinistinik ilinniartitaqarnerup qaffassarnissaa.  

Kalaallit Nunaani suliffiit immamut tunngassuteqartut annerit pineqartumut suleqataanerisa saniatigut inuussutissarsiutitut suliffinnut pineqartunut pilerisaarisarnissamut akisussaaqataanissaq piareersimaffigaat, taamatummi pilerisaaruteqartarnerni inuusuttut piukkunnartut imarsiornerup iluani ilinniarnissamutamerlanerit soqutigisaqarnerulernissaat anguneqassammat.  

Royal Greenland-ip, Royal Arctic Line-p aamma Polar Seafood Greenland-ip uani siuliani pineqartunut atatillugu Imarsiornermut Ilinniarfimmik, Kalaallit Nunaanni Sulisitsisunik aamma Ilinniartitaanermut Naalakkersuisoqarfimmik ajunngitsumik suleqateqarnertik tulluusimaarutigaat.