Ittoqqortoormiinut Tasiilamullu ukioq manna naggataamik umiarsuaqarnera kingorna Royal Arctic Line innuttaasunit saaffiginnissutinik tigusaqarpoq ukiunnginnerani umiarsuaqaqqinnissaa kissaatigineqarluni. Nioqqutinik pajugutigineqartut umiarsuaqaqqinnissaanut naammassannginnerat ernumassutigineqarpoq.
Nassiussat inniminnikkat tamakkerlugit apuuffissaannut eqqortunut apuunneqarnissaat qulakkeerniarlugu Royal Arctic Linep KNI qanimut oqaloqatigisimavaa. Peqatigiillutalu pajugutit pillugit apeqqutit misissorpagut, naliliinerlu tassaavoq nassiussanik umiarsuarmut kingullermut inniminnikkanik pilersaarutit malillugit tunniussisoqartoq.
Malik Arctica, containerinik 20-fodsinik 500-nik useqarsinnaasoq, ukioq manna Tunumut umiarsuit kingullersaraat. Umiarsuullu aqqusaarneranut kingullermut atatillugu sullitavut containerit 20-fodsit 100-t amerlaqataannik inniminniisimapput. Taamaattumillu umiarsuup useqarsinnaassusiata 1/5-ia taamaallaat atorneqarsimalluni. Taamaattumillu usinik amigaateqartoqarsimassappat tamanna useqarsinnaatsip amigarneranik pissuteqarani umiarsuup aqqusaarnissaanut kingullermut inniminnikkat amigarnerannik pissuteqarpoq.
Nioqqutissanik asiujanerusunik amigaateqarneq
Saaffiginnissutigineqartut aammalu sullitatsinnik oqaloqateqartarnerput tunngavigalugu naliliivugut ernumassutigineqarnerpaasoq tassaasoq nioqqutissanik asiujanerusunik ukiuunerata ingerlanerani amigaateqalersinnaanera. Sullitavullu suleqatigalugit misissorparput umiarsuarmik aqqusaartitseqqittoqassagaluarpat usinik qanoq annertutigisunik tamanna kinguneqassanersoq. Annertussutsit paasissutissiissutigineqartut ima killeqartigipput umiarsuarmik aqqusaartitseqqinnissaq akilersinnaanani, aamma tamanna periarfissaagaluarpalluunniit.
Assigiimmik akeqartitsineq
Royal Arctic Linep akigititai assigiimmik akeqartitsinissamik tunngaveqarput. Taamaattumik usit suminngaanniit aamma sumut nassiunneqaraluarpata akigitinneqartut assigiipput. Usinik assartuinermi timmisartukkut nassiussineq atussallugu qanorluunniit akisunerujuaannassaaq, taamaattumillu umiarsuakkut nassiussat timmisartukkut nassiussanut naleqqiullugit akikinnerusarnerat sullitatta malugisinnaasarpaat. Umiarsuarli containerinik 10-nik imaluunniit containerinik 500-nik assartuippat aningaasartuutit taakkuuginnassapput. Tamannalu pissutigalugu timmisartukkut aqquteqarnissaa inuiaqatigiit aningaasaqarnerannut pitsaanerpaatut aaqqiissutissatullu naleqqunnerpaatut nalilerneqarpoq – pingaartumik qaammatini umiarsuakkut assartuisoqarsinnaannginnerani nioqqutissanik asiujanerusunik sukkasuumik isumannaatsumillu pajuttuinissamut tunngatillugu.
Nioqqutissat asiujanerusut siornatigut Islandimit timmisartukkut nassiunneqartarput. Aqqulli taanna atorunnaarsimavoq. Timmisartukkut assartuineq umiarsuakkut assartuinermut naleqqiullugu aningaasartuutinik amerlanerusunik kinguneqartarnera ilisimavarput, taamaattumillu aamma umiarsuaqaqqinnissaanik kissaateqartoqarnera paasisinnaallugu. Taamaattorli – umiarsuaqaqqikkaluarpalluunniit – qaammatit arfinillit sinnerlugit umiarsuaqartussaannginnera suli atuutissaaq. Umiarsuaqaqqinnera taamaalilluni ukiuunerata nalaani nioqqutit asiujanerusut pissarsiarineqarsinnaanerinut allannguuteqassanngilaq.
Nioqqutissat asiujanerusut kisiisa pineqanngillat
Saaffiginnissutini Royal Arctic Linep innuttaasunit pissarsiarisimasaani nioqqutit asiujanerusut kisiisa ujartorneqanngillat. Sullitavut kaammattorusuppagut Royal Arctic Linep angalanermut pilersaarutaa, ingerlatseqatigiiffiup nittartagaani pissarsiarineqarsinnaasoq, eqqumaffigeqqullugu. Angalanermut pilersaarut ukioq ataaseq sioqqullugu ilisimaneqareertarpoq, Royal Arctic Linellu pilersaarusioqatigilluarneratigut oqaloqatigineratigullu nioqqutissat umiarsuarmik kingullermik assartugassatut kissaatigineqartut ukiortinnagu apuunneqarsinnaanissaat peqatigiilluta qulakkeersinnaavarput.
Apeqqutissaqartoqassappat Royal Arctic Linemi Tuniniaanermut pisortaq John Aage Nielsen johni@ral.gl-ikkut saaffigineqarsinnaavoq.
