Royal Arctic Linemi immikkut ittumik ataatsimeersuarneq ataasinngornermi oktobarip 13-iani 2025-mi ingerlanneqarpoq, tassanilu Pâviâraq Heilmann umiarsuaatileqatigiiffimmi ukiuni pingasuni siulittaasuusimaneranut Naalakkersuisunit qujassuteqarfigineqarpoq.
Inooraq Brandt, Royal Arctic Linemi siulersuisuinut siulittaasup tullerisimasaa, siulittaasussatut Naalakkersuisunit toqqarneqarpoq.
Siulittaasunngortoq immikkut ittumik ataatsimeersuarnermi oqalugiaammini ilaatigut ima oqarpoq:
Pilersaarusiukkamik aningaasaliiffigisassat annertuut siunitsinniipput; umiarsuaatigut eqqarsaatigalugit, nunami suliffeqarfiutigut eqqarsaatigalugit, nassiussalerinermut ataqatigiissaarutigut eqqarsaatigalugit, kiisalu sulisorpassuagut pikkorissut tunniusimasut suli ineriartortinniarlugit. Taakku pisariaqarput siunissamittaaq sullitatta pisariaqartitaat, naleqquttumillu pilersuisinnaanissaq inuiaqatigiiulluta suli ineriartornissatta iluaqutigisassaanik isumannaarinninniarluta. Assartugassat ikilisimanerini inuillu pinngortitarlu salliutillugit piuartitsinermik ukkataqarfiusumi, tamanna unammillernartuuvoq annikinngitsoq.
Royal Arctic Linemi siulersuisunut siulittaasunngortup umiarsuaatileqatigiiffiup iluatsilluartumik angusaqarnissaanut immikkoortut pingaaruteqartutut isigisani pingasut erseqqissaateqarfigai:
- Tutsuiginartumik ersarissumillu aalajangiisarnissaq attaveqatigiittarnissarlu.
- Suleqatigiinneq oqaloqatigiissinnaanerlu – suliffeqarfiup iluani, piginnittoq ilagalugu, kiisalu inuiaqatigiit sullitagullu kiffartugassagut ilagalugit.
- Aningaasaqarniarneq, avatangiisit, inuiaqatigiillu ataatsimoortillugit piujuartitsisumik ineriartortitsineq.
Peqatigisaanik siulersuisunut ilaasortanngortoq, siornatigut umiarsuaatileqatigiiffimmi sulisoqarnermut pisortaasimasoq, Tommy Ege Kristensen, Naalakkersuisunit tikilluaqquneqarpoq.
Royal Arctic Linemi siulersuisut Naalakkersuisunit toqqarneqartut taamaalillutik tassaapput: Inooraq Brandt, Barbara Agersnap, Flemming Drechsel, Jóhanna á Bergi, Minannguaq Zeeb aamma Tommy Egede Kristensen – kiisalu ilaasortat sulisunit qinigaasut pingasut: Eydun Simonsen, Laust Vestergaard aamma Tina Lange Olsen.
