Suliffeqarfissuaq siunissami aningaasaliissutissanut pilersornerullu isumannaatsuunissaanut tunngavissanik nukittorsaavoq.
Royal Arctic Linep 2025-mi naatsorsuutaani takuneqarsinnaavoq suliffeqarfissuaq akileraarutit sioqqullugit 15 mio. koruuninik sinneqartooruteqartoq. Tamanna ukiup siulianut sanilliullugu 9 mio. koruuninik annertuneruvoq. Tamanna anguneqarsinnaasimavoq, naak Nunatsinni aningaasarsiornerup ingerlanerani appariaateqartoqarsimagaluartoq, pingaartumik sanaartornermut aalisarnermullu tunngatillugu nassiussat annikillinerat eqqarsaatigalugu.
Nassiussat ikilinerisa sunniutaat annikillisinniarlugu suliffeqarfik ingerlatsinermut tunngatillugu naleqqussaasimavoq aammalu avataani suliassanik nutaanik ujartuisimalluni, tamannalu pitsaasumik angusaqarnissamut sunniuteqarsimavoq. Suliffeqarfiup ataaniittoq Arctic Umiaq Line aamma annikitsumik sinneqartooruteqarpoq, ukiulli siuliani amigartooruteqarneranut sanilliullugu angusai ersiutilimmik pitsaanerulersimallutik. Iliuuseqarnerit peqqutigalugit sinneqartoorneq anguneqarsinnaasimavoq, soorlu angalanermut pilersaarutit innuttaasunut iluaqutaasussanngorlugit allanngortinnerisigut billetinik tuniniaaneq ingerlalluarnerulerpoq takornariaqarnermullu aamma kalluaagani.
Naak aningaasarsiorneq Nunatsinni annikilleriarsimagaluartoq, taamaattoq suliffeqarfissuup angusai naammaginartutut oqaatigineqarsinnaapput, kisiannili siunissami aningaasaliissutissat naammattut piginissaannut angorusutatut naatsorsuutigineqartunit appasinnerullutik.
2026-mut naatsorsuutigisat
2026-mi akileraarutit sioqqullugit 15-25 mio. koruuninik sinneqartooruteqarnissaq naatsorsuutigineqarpoq. Taamatut sinneqartooruteqarneq Royal Arctic Linep aningaasatigut tunngaviinik nukittorsaassaaq, soorlu umiarsuarnik nutaanik, pramminik nutaanik pajuttaatinillu immikkut Issittumut tulluarsakkanik sanaanik aningaasaliisinnaanngorlugu. Aningaasaliinerit taakkua Nunatsinni pilersuinermi aaqqissuussinerup siunissamut ungasissumut patajaallisarneqarnissaanut qulakkeerinneqataassapput.
