2026-mi ukiup affaani siullermi nassiussat amerleriarnerat Royal Arctic Linep malugai, taamaalillunilu kaaviiaartitat aamma qaffallutik. Ineriartorneq tamanna tunngavigalugu ingerlatseqatigiiffiup maanna naatsorsuutigaa ukioq manna angusat siusinnerusukkut missingersuutigineqartuniit pitsaanerussasut.
Nassiussanik assartuinerit siorna ukiup affaanut siullermut sanilliullugit 2,7 procentimik amerleriaateqarsimapput. Taamaalilluni 2025-mi annertuumik appariaateqarfioreernerata kingorna qaffakkiartuaaqqilernera takussutissaqalerluni.
Naak aningaasartuutit qaffariaateqaraluartut taamaattoq Royal Arctic Linep naatsorsuutigaa 2026-mi akileraarutit suli akilertinnagit angusat 25 aamma 35 millioner koruunit akornanniissasut. Tamanna siusinnerusukkut naatsorsuutigineqartumit, tassa 15 aamma 25 millioner koruunit akornanniittussatut naatsorsuutigineqartumit qaffasinneruvoq.
“Ukioq manna ukiup affaani siullermi ineriartorneq naammagisimaarparput. Nassiussanik assartuisarneq annikitsumik qaffakkiartorusaarpoq, aammalu siusinnerusukkut missingersuutigineqartunit pitsaanerusumik angusaqarnissarput naatsorsuutigaarput. Tamanna isumaqarpoq ingerlatseqatigiiffiup umiarsuaataasa nutarterneqarnissaannut aningaasaliinissamut uninngasuutissanik pisariaqartunik katersueqqissinnaaleriartussasugut,” taama oqarpoq aningaasaqarnermut pisortaq Jørgen Aqe Møller.
Arctic Umiaq Line aamma pitsaasumik ineriartorpoq. Ilaasut amerlassusiat siorna piffissamut tassunga sanilliullugu 29 procentimik qaffariaateqarsimapput.
Ingerlatseqatigiiffiup digitaliusunik aaqqiissutinik nutaaliaanerusunik peqalernissaanut aningaasaliissutitigut kiisalu umiarsuit ingerlaavartumik nutarterneqarnissaannut Royal Arctic Linep sulissutiginninnini ingerlatiinnarpaa.
Paasissutissanik amerlanerusunik pissarsisoqarsinnaavoq uunga:
Jørgen Aqe Møller
Aningaasaqarnermut pisortaq
Royal Arctic Line
jaqm@ral.gl
