Biilinik, umiatsianik, sanaartornermi maskiinanik allanillu navianartutut nassiussanik assartuineq
Royal Arctic Linemit paasissutissiineq
Umiarsuaatitsinnik assartuinermut akigitinneqartut aalajangiusimaannarneqarput, pappialarsornertaali allanngorpoq.
Sullitatsinnut matumuuna erseqqissaatigissavarput nunani tamalaani malittarisassat sukateriffigineqarnerisa kingunerisaanik – matumani pineqarluni IMDG-kodep Amendment 35-ia (International Maritime Dangerous Goods Code) – maskiinat, qamutit assakaasullit umiatsiallu suulluunniit 2012-imi aggustip aallaqqaataanit atuutilersumik Nassiussatut Navianartutut Royal Arctic Linemit ingerlatseqatigiiffinniillu pigisaanit suliarineqartalermata.
Amendment 35 malillugu, qamutit assakaasullit maskiinallu orsussatortumik motoorillit aamma/imaluunniit orsussamik ingerlatillit (batteriit) Nassiussatut Navianartutut klasse 9-tut nalunaarsugaassapput.
Ilinnut sullitatut sunniutissaa
Maskiinat motoorillit Nassiussatut Navianartutut klasse 9-tut nalunaarsugaatillugit, illit sullitatut Nassiussanut Navianartunut Nalunaarut immersussavat, ilaatigullu uani nassaarineqarsinnaavoq. Taanna nassiussap tunniunneqarnerani ilanngullugu tunniunneqassaaq.
Nalunaarutip immersornissaa illit akisussaaffigalugulu pisussaaffigivat. Royal Arctic Line ingerlatseqatigiiffiillu pigisai immersuinissamut ikiuisinnaanngillat, tamanna malittarisassanik atuuttunik unioqqutitsinerussammat.
Tamatumunnga peqatigitillugu illit sullitatut – ullumikkutut – eqqumaffigissavat orsussamut tanki ¼ sinnerlugu imaqassanngimmat – maskiinalli anginerusut annerpaamik orsussamik 250 liiterimik imaqarsinnaatitaapput.
Piumasaqaat taanna naammassineqarpat Nassiussanullu Navianartunut Nalunaarut immersorneqarsimappat, taava nassiussassat Nassiussatut Navianartutut klasse 9-tut nassiunneqarsinnaapput, Royal Arctic Linellu biilinut, umiatsianut sanaartornermilu maskiinanut maanna akigitinneqartoq aalajangiusimaannassavaa (akit allattorsimaffiat uaniittoq aamma takusinnaavaat).
Nassiussanut Navianartunut Nalunaarummik eqqortumik immersorneqarsimasumik tunniussisoqarsimanngippat nassiussat tunniunneqarnerini itigartitsissutigineqassapput.
Orsussamut piumasaqaatit naammassineqarsimanngippata, nassiussassat Nassiussatut Navianartutut klasse 3-tut nalunaarsorneqassapput – Nassiussanullu Navianartunut assartuinermut akigitinneqartoq naapertorlugu akilerneqarlutik.
Nalunaaqutsersuineq
Biilit, umiatsiat maskiinallu Nassiussatut Navianartutut klasse 3-tut nassiunneqartut nipitittakkamik NALUNAAQUTSERNEQASSANNGILLAT, taakku Provision 962 naapertorlugu Nassiussanik Navianartunik nalunaaqutsersuisarnermut malittarisassanut nalinginnaasunut ilaatinneqanngimmata. Ilaatinneqannginneralli maskiinat motoorillit sullitamit containerimut poortorneqarsimappata (FCL) containerimut atuutsinneqassanngilaq. Taamaattoqartillugu containeri Nassiussanik Navianartunik imalittut nalunaaqutserneqassaaq.
Ilaatinneqanngitsut
IMDG-p Provision 961-ia naapertorlugu Amendment 35-mi piumasaqaatinut ilaatinneqanngitsut arlaqarput. Taakkunani pineqarput motoorit imaqanngitsut salinneqarsimasullu batteriillu atassuserneqarsimanngitsut. Ilaatinneqanngitsut pillugit uani annertunerusumik paasisaqarsinnaavutit – Royal Arctic Linemiilli aalajangerneqarmat maskiinanut Nassiussatut Navianartutut klasse 9-tut nalunaarsorneqarsinnaasunut annertunerusumik akiliuteqartitsisoqassanngitsoq, Provision 962-ip atornissaa kissaatigigukku, uagut naliliinerput malillugu, tamanna ilinnut sullitatut iluaqutissartaqarnavianngilaq.
Assartuussisartut allat
Maskiinanik motoorilinnik assartuinerit Royal Arctic Linep ingerlatseqatigiiffiillu pigisaata saniatigut assartuussisartut assartugalerinermillu ingerlatseqatigiiffiit allat atorlugit siorna kingornalu pissappat, ingerlatseqatigiiffiit pineqartut nassiussamut nalunaarsuinerat atuutsinneqassaaq. Nassiussarlu taakkunannga Nassiussatut Navianartutut klasse 3-tut nalunaarsorneqarsimappat, Royal Arctic Linemit assartorneqarnera aamma Nassiussanut Navianartunut akigitinneqartoq malillugu akilerneqassaaq.
USA, Canada
Biilinut, umiatsianut sanaartornermilu maskiinanut allanullu USA-mit Canadamiillu Eimskipimit Reykjavikimut imaatigut assartorneqartunut qulaani malittarisassat atuupput. USA-mit Canadamiillu assartuinermut tamakkiisumik neqeroorummik suliaqartitserusukkuit kundeservice@ral.gl attavigineqarsinnaavoq.
Biilinik, umiatsianik maskiinanillu motoorilinnik allanik assartuineq pillugu paasisaqarnerorusukkuit, Royal Arctic Linep kiffartuussivia attavigineqarsinnaavoq +299 70 15 01, kundeservice@ral.gl.