Poortuineq

Royal Arctic Linep umiarsui atorlugit nassiussanik assartuineq ukioq kaajallallugu ullut tamaasa ingerlanneqartarpoq. Umiarsuillu sila qanoq ikkaluarpalluunniit angalasarmata assartuineq nassiussanut piumasaqaatitaqarfiusarpoq, pingaartumik ukiuunerani qaammatini imaatigut angallanneq ilungersunarsinnaasarpoq umiarsuit ukiuunerani anorersuarnerani aamma angalasinnaasarmata.

Tamatuma saniatigut nassiussat ingerlaarnerminni arlaleriarlugit aamma nuunneqarsinnaasarput. 

Taamaammat nassiussat umiarsuakkut assartorneqarnissaminnut terminaleqarfinnilu isumagineqarnissaminnut qajannaarsarneqarsimanissaat pingaaruteqarpoq.

Taamaammat nassiussat illersorneqarsinnaasumik poortornissaat tamatigut eqqaamasassaavoq. Poortuutissarlu nassiussap suussusianut, oqimaassusianut qajannassusianullu naleqquttoq atorneqassaaq.