Assartuinermut aalajangersakkat

 

Aaliangersakkat ataani allaqqasut Royal Arctic Linep umiarsuaatai attartugaaluunniit atorlugit nassiussanik angallassinerni tamani atuupput. Uani pdf aaguk

§ 1
Royal Arctic Line tamatigut nassiussassat tamaasa containerimut ikisarpaat, tamanna pisinnaagaangat, allatut iliornikkut flatracksinut assigisaannullu isumannaallisakkanut iliorarneqartarlutik. Nassiussanik poortuinerit usiliussinerillu DHAB 2007-mi aaliangersakkat malillugit pisarput, poortuineq usilersuinerlu talittarfimmi pinngikkaangata, taamaatsillugu imaani inatsisit atuuttut naapertorlugit ingerlanneqartarlutik.

§ 1 A
Royal Arctic Linep nassiussat containerini flatracksini assartuutinilu assigisaanni usitut umiarsuup qaaniittutut assartuinissaq pisinnaatitaaffigaa. Pisariaqartilluguttaaq immikkut ittumik usit tamalaat umiarsuakkut nassiunneqarsinnaapput. Royal Arctic Line nassiussanik containerinut allanulluunniit matoqqasumik nassiussanut misissuineq ajorpoq, uani pineqarlutik poortorneqarneri, isikkui usiliussornerilu.

§ 2
Royal Arctic Linep sullissinermi suliassarai talittarfimmukaassanik nassiussassanik usilersorneq, angallassineq kiisalu usingiaaneq talittarfinni. Nassiussat Royal Arctic Linep nakkutigisassarivai assartuinermi, umiarsuakkut angallassinermi taavalu nassiussap tigusisussamut apuunnissaata tungaanut, kingusinnerpaamik tiguneraniit aaneqarnissaanut piffissaliussaq ulloq nallersiillugu, tassani containerinik attartorneq quersuarmiititsinerlu Royal Arctic Linep akisussaaffigissavaa, imaani inatsisit naapertuuttut atorlugit. Allatut allakkatigut isumaqatigiissusiortoqarsimatinnagu containerimik attartorneq quersuarmiitsitsinerlu piffissaliussap kingorna, tigusisussap akiligassarissavaa akisussaaffigissallugulu. Taamatuttaaq nassiussassat nassiussiffissamik inniminniineq sioqqullugu umiarsualivimmut apuussat nassiussisup akisussaaffigissavai allakkatigut isumaqatigiissusiortoqarsimatinnagu, piffissami nassiussiffissap tungaanut atuuttumi.

§ 2 A
Usinik nassiussanik tunniussineq Royal Arctic Linemit pissaaq nassiussat allagartaani tigusisussamut allaqqasumut tunniussinermi.

§ 3
Royal Arctic Linep nassiussamut akisussaaffiata imaani maleruagassani § 280 naapertorlugu kisitsit SDR 667 per kolli/nassiussatut allatulluunniit nassiunneqarsimappat, imaluunniit SDR 2 kg-mut qaangissanngilai. Kinguaattoornermut akisussaaffiup 2,5 X nassiussaq qaangissanngilaa. Akisussaaffiulli nassiussap ataatsimut angissusaa nassiussinissamut isumaqatigiissutigineqartoq sinnersimassanngilaa. Allattukkat, nassiussinermi nalunaarsuinerit allatigulluunniit ilassutitut nalunaarsuinerit angallassisumut tunniunneqartut nassiussap nalinganut tunngassutillit, isumaqanngillat imaani malittarisassat naapertorlugit angallassisup akisussaaffia sipporlugu Royal Arctic Line akisussaaffimmik tigusisuusoq.

§ 4
Royal Arctic Line akisussaasuunngilaq uumasunik nassiussanik ajutoortoqarsimatillugu, imaani inatsisit atuuttut naapertorlugit §277 malillugu.

§ 5
Royal Arctic Line kukkussuteqarsimaguni allatigulluunniit sumiginnaasimaguni nassiussat tungaatigut akisussaaffinnik tamanik iperaassaaq nassiussat nalunaarsorneqarsimanngippata, imaluunniit nassiussinermut allagartaqanngippata uppernarsaammik. Taamatut naammattuuinermi Royal Arctic Line pisinnaatitaaffeqarpoq angallassinerup unitsiinnarnissaanut.

§ 6
Royal Arctic Linep pisinnaatitaaffigaa angallassineq isumaqatigiissutip saniatigut allamik umiarsuarmik ingerlanneqarsinnaasoq. Nassiussinermi allagartap Royal Arctic Linep suliaata iluaniittup, umiarsuup usiliussassatut pilersaarutaa malillugu ingerlanneqassaaq. Isumaqatigiissutaavoq Royal Arctic Linep nassiussat ingerlaarnissaat allanngortissinnaagaa kinguartillugu, sullitap Royal Arctic Linemut piumasaqaateqarsinnaanera tassani atuutsinneqarani.

§ 7
Royal Arctic Line pisussaavoq ersarissumik nalunaarutigereerneratigiut, angallassinerup ilaa aaliangersimasoq angallassisumik allamik ingerlanneqarsinnaanissaanik; taamatullu angallassinerup iluani nassiussaq ajoqusersimassappat Royal Arctic Line akisussaasuussanngilaq. 

§ 8
Royal Arctic Line pisinnaatitaavoq ingerlaarnissamut pilersaarutit ingerlaarfiillu avaqqussinnaanissaannut, tamanna pissutsit malillugit Royal Arctic Linep pisariaqarsorippagu.

§ 9
Ajoqusernerit, annaasaqarnerit imaluunniit kinguaattoornerit usilersuinermi usingiaanermi quersuarmiitsitsinermiluunniit pissutsit ajornakusoorsimappata Kalaallit Nunaanni Danmarkimilu Royal Arctic Linep isumagisassarissanngilai. Royal Arctic Line akisussaasuussaaq taamak immikkut ittunik pisoqartillugu, ajoqusernerni, annaasaqarnerni imaluunniit kinguaattoornerni nalunaarsuinissaq.

§ 10 
Umiiartoqarsimatillugu Royal Arctic Linep aaliangigaani piffimmi naatsorsuisoqassaaq York/Antwerpenip ataani inatsisit atuuttut naapertorlugit, usinillu tigusisussaq (usinik piginnittoq) pisussaatitaassaaq umiiartoqarnerani tapiiffiginnittumik akiliissalluni ajoqusernerit inatsisit atuuttut malillugit naatsorsorneqareerpata.

§ 11 
Angallassineq Royal Arctic Linep akissatut aaliangersagai malillugit kiisalu imaani angallannermi inatsisit atuuttut kapitel 13-imiittut malillugit ingerlanneqassaaq.

§ 12
Nassiussaq tunniunneqareerpat, tigusisullu Royal Arctic Linemut allakkatigut ilisimatinngippagit ajoqusersimaneranik, tigunerani tigusisup malugisimasaminik imaluunniit malugisussarigaluagaanik allaqqasumik kiisalu ajoqusersimanerata annertussusaanik paasissutissiisumik imalimmik, taava nassiussaq ajoqusersimanngitsutut nassiussallu allagartaanisut allaqqasutut isigineqassaaq. Tunniussinermi nassiussap ajoqusersimanera malugineqanngippat tamanna aamma atuutissaaq nassiussap tiguneraniit kingusinnerpaamik ullut pingasut qaangiutsinnagit allakkatigut nalunaarutigineqanngippat. Nassiussaq ajoqusersimappat aserorsimappalluunniit taava Royal Arctic Line nassiussamillu tigusisoq nassiussamik misissueqatigiissapput torersumik ingerlanneqartumik, tassani nassiussat oqimaassusaat, angissusaat amerlassusaallu paasiniarneqassallutik.

§ 13 
Nassiussaq ajoqusersimappat, tammaaneqarpat imaluunniit kinguaattoorpat nassiussap assartuummik allamik Royal Arctic Linep assartuinissamut isumaqatigiissuteqarnermigut atortitaanik, taava Royal Arctic Line akisussaasuussaaq, assartuinermi inatsisit atuuttut malillugit aammalu nalinginnaasumik peqqussutigineqartut Royal Arctic Linep assartuinermi suleqatigisaani atuuttut malillugit.

§ 14
Aningaasat, pappialat nalillit, allallu nalillit pillugit, Royal Arctic Line taamaallaat akisussaasuussaaq, allakkatigut isumaqatigiissusiortoqarsimatillugu.

§ 15
Royal Arctic Line piginnittussaatitaasutut allaqqavoq nassiussalerinermi, suliffeqarfiup nakkutigisaaniittuni, ilaatigut nassiussat inissisimaffiini, aammalu quersuarmik attartornermi taamatullu Royal Arctic Linep siusinnerusukkut angallassinerniit kiffartuussinerniillu pisassarisai kiffartuussisitsisuminngaanneersut. Nassiussaq tammarpat aserorpalluunniit, taava Royal Arctic Line sillimmasiisarfimmiit taarsiivigitinnissamut pisinnaatitaavoq, nassiussinermi aningaasartuutinut matussusiisussanik. Akileeqqusissut akilerneqanngippat, taava Royal Arctic Line pisussaatitaavoq aarlerinanngitsumik nassiussamik tunisinnaasaminik tunisisinnaalluni, taamaalilluni aningaasartuutit matussusersinnaajumallugit.

§ 15 A
Nassiussinermi aki akilerneqassaaq, apeqqutaanani nassiussap apuunnerani ajoqusersimanersoq ajoqusersimannginnersorluunniit, ajoqusersimagaluarpalluunniit nassiunnerata akia utertinneqarsinnaanngilaq taarserneqaranilu.

§ 16
Royal Arctic Line imaani inatsit atuuttoq § 272 naapertorlugu nassiussat aaneqarnissaannik allagaqaraluarnerup kingorna aaneqanngitsoortut tuniniarsinnaatitaavai. Allakkatigut sullitamut Royal Arctic-imiit nassiussaq tigusisussamut tiguneqarsimasutut ilimagineqassaaq, allamik tutsaqartoqanngipppat. Royal Arctic Linep nalilerpagu nassiussap nalingata tuniniarnerani aningaasartuutaasut matussusernavianngikkai, taava allatut Royal Arctic Linep nassiussaq atorsinnaatitaavaa. Nassiussaq tunineqarpat aningaasartuutigisallu tamakkiisumik matussuserneqanngippata, taava nassiussisoq akisussaasuuvoq aningaasartuutit matussuserneqanngitsut akilissallugit.

§ 17
Royal Arctic Line assartuinermi usingiaanermi inissisimatitsinermilu nassiussanik ajoqusertunik akisussaasuussanngilaq, ajoqusernerit silap pissusaanik peqquteqarpata, allatigulluunniit kiassuseq/nillissuseq peqqutaalluni nassiussaq ajoqusersimappat. Royal Arctic Line taamaammat akisussaasuussanngilaq assersuutigalugu nassiussat nalinginnaasutut allaqqatillugit nassiussat qerisoorlutik ajortissimappata.

§ 18
Uku assartuinermi aaliangersakkani aaliangiussat Royal Arctic Linep oqartussaaffii aammalu akisussaaffimmik killeqartitsineri atuutissapput Royal Arctic Linep suliassaqarfiisa iluini piumasaqaateqartoqarpat, piumasaqartullu uppernarsarsinnaappagu sulisup sulinermini suliassamillu naammassinninniarmini iliuuseqarsimanera.
Akisussaaffik tamakkiisoq Royal Arctic Linemut suliassaqarfiinullu tutsinneqarsinnaasoq sukkulluunniit akisussaaffiup killeqarfii qaangissanngilaat, imaani inatsisit atuuttut § 280-imiittut naapertorlugit.

§ 19
Suliakkiussisup pisussaatitaaffigaa kukkusoqarsimanngikkaluarpalluunniit Royal Arctic Line annaasaqartissanagu nassiussanik ajoqusertoqarsimappat ima pisoqarsimatillugu, a) paasissutissat nassiussamut tunngassutillit eqqortuunngippata, ersernerluppata imaluunniit amigaateqarpata, b) nassiussaq amigartumik poortorneqarsimappat, amigartumik meqqilerneqarsimappat imaluunniit imarisaasa suussusaasa allassimanerat amigaateqarpat, imaluunniit suliakkiussisup amigartumik usiliussimappagu, qajannaarsornerlussimappaguluunniit, c) nassiussaq ajoqusiisinnaasunik imaqarpat, Royal Arctic Linemut takujuminaassinnaasunik, d) umiarsuaatileqatigiiffik suliakkiussisup kukkussuteqarneranik sumiginnaaneranilluunniit akitsuutinik akiligassaqalerpat imaluunniit naalagaaffiup akitsuusersuutaannik eqqugaappat.
Suliakkiussisup akisussaasuuneranik aaliangiussineq immikkoortuni a)-mi b)-milu isiginiarneqasssaaq Royal Arctic Line nalunngikkaluarlugu pissutsit qanoq isikkoqarnersut akuersisimanera imaluunniit suliakkiussisumut naqqiissummik oqaaseqarsimannginnera nassiussamut tunngassutilimmik.

§ 20
Nassiussisup usit navianartut imaluunniit usitut navianartutut immikkut allagartaqartinnagit nassiunneqarsinnaanngitsut nassiuppagit paasissutissanik imaqartinnagit, imaluunniit usit suunerinik allaqqatitaqarani, taava nassiussisoq akisussaasuuvoq umiarsuaatileqatigiiffimmut assartuisunulluunniit ajoqusernernut annaasaqaataasunulluunniit, taassuma iluaniilluni akiligassinneqarneq. Taamaattoqarnerani nassiussisoq pisussaatitaavoq umiarsuaatileqatigiiffimmut akitsuutinik DKK 25.000-inik akiliisussaalluni, umiarsuaatileqatigiiffik aningaasatigut annaasaqarsimagaluarpalluunniit.

§ 21
Danmarkimi angallassinermut assartuinermullu inatsisit isumaqatigiissutillu Royal Arctic Linemi atuutsinneqarput. Suliakkiisoq Kalaallit Nunaanninngaanneersuuppat taava Kalaallit Nunaanni Eqqartuussisoqarfiit kisimik pisussaaffeqarput isumaqatigiinnginnernut angallassinermut assartuinermut allanillu sullissinerup iluaniittunut Royal Arctic Linep ingerlatarisaanut aalajangiisussaasutut. Suliakkiisoq Kalaallit Nunaata avataaneersuuppat taava Danmarkimi eqqartuussisoqarfiit, tassunga atallutik Sø- og Handelsretten i København, kisimik aalajangiisussaatitaapput.

§ 22 
Containerinik attartorneq/attartortitsinerlu. Sullitaq containerimik Royal Arctic Linemit attartorsimatilluni ajoqusiippat annaasaqaateqarpalluunniit Royal Arctic Line akisussaasuunngilaq, tassunga ilaallutik nassiussat containerip iluaniittut aserorsimappata containerimi sananeqaammigut kukkuneqarsimappat amigaateqarpalluunniit (qanorluunniit piumasaqaat peqquserneqaraluarpat), Royal Arctic Line nammineq pisuunngikkuni, sulisulluunniit Royal Arctic Linemi mianersugaalliornikkut aseruisimanngippata Royal Arctic Line akisussaasuunngilaq. Royal Arctic Line akisussaasuunngilaq nassiussat kukkuneqarnerinut sumiginnaanermulluunniit, tassaniilluni nioqqummut, sanaartorfimmut, piniarfigisamut, assigisaanulluunniit, nioqqutip sananeqarnerani, tuniniarneqarnerani, iluarsartuunneqarnerani containerilluunniit aserfallatsaalineqarneranut tunngassutilimmut, akisussaaffik inissinneqarsinnaappat, tassani apeqqutaanani kukkunerit taamaattut sumiginnaanermik imaluunniit mianersuaalliornermik tunngaveqaraluarpata. 

Royal Arctic Linep ataatsimut sullitaminut akisussaaffiata susoqaraluarpalluunniit containerimik attartornermi/atukkiussinermi ajoqusertoqarsimatillugu 15.000 kr. sinnissanngilaa.

Attartortoq akisussaasuussaaq ajutoornernut tamanut, taassuma iluani aamma piffissap attartornerup iluani tammaasaqarnermi.

Nassuiaatit
Ataani allaqqasut nassuiaatit Royal Arctic Linep assartuinermut aalajangersagaanut ilaapput.

Nassiussinermi akissatut aalajangersakkat
Assartuinermi akissatut aalajangersakkat Royal Arctic Linemi taakkuupput nassiussanik imaatigut assartuinernut tunngassutillit, Kalaallit Nunaannit, Kalaallit Nunaatalu iluani, Namminersorlutik Oqartussat akuersissutaat naapertorlugit ingerlatsinermi, aammalu sullissinissamik isumaqatigiissutit nunaqarfiliartarnerni aammalu umiarsualivinni sullissinerit iluini.
Taakku saniatigut akissatut aalajangersakkat iluaniipput kiffartuussinerit sullissinerit iluini.

Assartuinermi akigititat 
Royal Arctic Linep assartuinermi akigititai tunngavimmigut ima inississugaapput:

A
Umiarsualivimmi nassiussiffimmi isumaginninneq. Aki akigitinneqartoq uani tassaavoq kubikmeterimut kg-mut ilivitsukkaamulluunniit aki, umiarsualivimmi tunniussiffimmi isumaginninnermut tunngatillugu, nassiussassap tunniunneqarneranit umiarsuarmut usiliunneqarnissaata tungaanut. Isumaginninnerup iluaniippoq bookingimi uppernarsaammi ulluliussap iluani quersuarmiititsigallarneq.

B
Imaatigut assartuineq. Aki kubikmeterimut, kg-mut, ilivitsukkaamulluunniit nassiussamut umiarsualivik nassiussivimmit umiarsualivimmut nassiussiffimmut apuunnissaanut.

C
Umiarsualivimmi nassiussap apuuffiani isumaginninneq. Aki kubikmeterimut, kg-mut, ilivitsukkaamulluunniit nassiussap apuuffiani umiarsualivimmi isumaginninnermut akigititaq, nassiussap umiarsuarmit usingiarneqarneranit apuuffissamut tunniunneqarfissaata tungaanut atuuttoq. Isumaginninnermut ilaavoq quersuarmiititsinermi piffissaliussap iluani akigititat nassiussap allagartaa malillugu. Imaani assartuinermi isumaginninnermilu akigititat akit allattorsimaffianni takuneqarsinnaapput.

D
Assartuinermut tunngatillugu akigititat allat. Nassiussivimmi apuuffimmilu nassiussanik isumaginninnerup imaatigullu assartuinerup saniatigut nassiussat suussusai apeqqutaallutik tapiliussanik ilanngussisoqartarpoq, assersuutigalugu oqimaassutsimut ilassut nassiussanut annertuunut akigitinneqartartoq.

Tapiliussat/ilanngaatit. 
Nassiussap assartornerani tapiliunneqassapput/ilanngaatigineqassapput ataani allaqqasut:

E
Uuliamut tapi aamma nunat allat aningaasaasa nalingisa nikerartarnerannut iluarsiissut. Uuliamut tapi nunat allat aningaasaasa nalingisa nikerartarnerannut iluarsiissut immikkut piniarneqartarpoq uuliap akiata nikerarnera aammalu valutap allanngorarnera (USD) peqqutaallutik. Uuliamut valutamullu tapiliussaq piffissami tassani atuuttoq ataatsimut uku akiannut ilassutitut procentiliunneqartarpoq:

  • umiarsualivimmi nassiussiartorfimmi nassiussassamik isumaginninneq
  • imaatigut assartuineq
  • apuuffimmi umiarsualivimmi nassiussamik isumaginninneq

Uuliamut valutamullu tapiliussat atuuttut Royal Arctic Linemit paasissutissiissutigineqassapput.

Nassiussat suuneri
Nassiussat tamarmik Kalaallit Nunaata iluani avataanilu imatut immikkoortiterneqartarput:

F
Usit tamalaat (LCL). Usit tamalaat tassaapput nammineq immiussanik containerinik nassiussaanngitsut (FLC), annertuumik nassiussaanngitsut kiisaalu suliniutinut ilaasutut nassiussaanngitsut. Usit tamalaat aamma naalisarlugu LCL-imik taaneqartarput (Less Container Load). 
Usinut tamalaanut tunngatillugu aalajangersakkat immikkoortumi 4.1-imi nassaarineqarsinnaapput.

G
Containerit sullitat namminneq immigaat (FLC). Containerit sullitat namminneq immigaat tassaapput nassiussat tamalaat ISO-containerinik FLC-imilluunniit assigisaannik nassiunneqartut (ataani nassuiarneqartutut angallassinermi atortut/FLC-it atortuisa ataanni), nassiussisumik nammineq immerneqartoq, tigusisumiillu imaarneqartussaq. Sullitat namminneq immerlugit nassiussaat FLC-imik taaneqartarput. (Full Container Load).
Sullitat namminneq immerlugit nassiussaannut tunngatillugu aalajangersakkat immikkoortumi 4.2-imi nassaarineqarsinnaapput.

H
Nassiussat annertuut. Nassiussat annertuut tassaapput nassiussat portussutsimut, silissutsimut takissutsimullu nassiussanut akigititat allattorsimaffiinit immikkoortoq 5.1-imit anginerusut tamarmik.

I
Suliniutitut nassiussat. Suliniutitut nassiussat tassaapput nassiussat akigititanik aalajangersakkani immikkoortumi 5.2-mi nassuiaasersorneqartut.

J
Nassiussat suussusaat. Kalaallit Nunaata iluani avataanilu nassiussat tamarmik suussutsinut agguataarneqartarput:

Nassiussat suussusaat

  • Nassiussat nalinginnaasut
  • Nassiussat kissassutsimi/nillissutsimi aalajangersimasumiittussat
  • Usit navianartut kissassutsimi/nillissutsimi aalajangersimasumiittussat
  • Usit navianartut
  • Igitassat nassiussat
  • Nassiussat allequtsikkat
  • Angallatit/ingerlatit
  • Angallannermut atortut


Sullitat namminneq containerit immigai (FCL)

Nassiussat suussusaat

  • Nassiussat nalinginnaasut
  • Nassiussat kissassutsimi/nillissutsimi aalajangersimasumiittussat
  • Usit navianartut
  • Igitassat nassiussat
  • Nassiussat allequtsikkat
  • Angallannermut atortut


Allat
 

Nassiussat suussusaat

  • Nassiussat annertuut
  • Suliniutitut nassiussat

Angallannermi atortut
Angallassinermi atortut Kalaallit Nunaanni ingerlatsinermi atorneqartartut makkuupput:


LCL-ip atortui.
 LCL-ip atortui makkuupput

  • ”shipper’s own” containerit, containerit ammasut, containerit siaartartut, ilitsiviit (flatbeds), aammalu tankcontainerit FLC-ip atortuinut ilaanngitsut
  • RAL-ip UUR-ulluunniit pigisai pallet assigisaallu


FCL-ip atortui. FCL-ip atortui makkuupput

  • Royal Arctic Linep MC-containeriutai
  • Royal Arctic Linep kiisalu “shipper’s ownip” 20 fods, 40 fods aammalu ISO-containeriutai (naliginnaasutut kiisalu kissassutsimut/ nillissutsimut nakkutigalugit nassiussat), containerit ammasut, containerit siaartartut aammalu tankcontainerit; FLC-ip atortuinut tunngassutillit immikkoortoq 10.3-mi atuarneqarsinnaapput.

O
Sumiiffiit akigititaqarfiit. Akigititaqarfiit tassaapput allattorsimaffimmi immikkoortumi 3.2-mi illoqarfiit nunaqarfiillu allaqqasut. Akigitinneqartut iluanni nassiussanik isumaginninnerup akii assigiiaarput.

P
Sumiiffiit ingerlaarfiit. Royal Arctic Linep nalinginnaasumik ingerlaarfii tassaapput illoqarfiit nunaqarfiillu Danmarkimiittut, Islandimiittut Kalaallit Nunaanniittullu, allattorsimaffimmi immikkoortumi 3.3-mi allaqqasut, taakkulu saniatigut aamma Kalaallit Nunaanni inoqarfiunngitsuni sanaartorfiusunut uuliasiortunut aatsitassarsiortunulluunniit assigisaannullu pajunneq suliassaqarfiit ilagivaat.

Quersuarmiititsineq atortunillu attartorneq
Imaani angallassinermut atatillugu Royal Arctic Line saniatigut kiffartuussisarpoq immikkut akeqartinneqartunik.

Q
Tamalaanik nassiussinermi (LCL) pallenik atorneq. Nassiussinermi 0,33 kbm imaluunniit 20 kg sinnerlugu nassiussinermi nassiussisumit allequtaqartinnagu tunniussani isumaqatigiissutit naapertorlugit immikkoortumi 4.1-imi pallemik atorneq ilanngunneqartarpoq.

R
Tamalaanik nassiussinermi (LCL) quersuarmiititsineq. Nassiussinermi quersuarmiititsineq inissaqartitsinermullu akiliut ukunani nassiussinerni atuutsinneqartarpoq

  • Inniminniineq malillugu tunniussiffissaq ulloq sioqqullugu nassiussisoq nassiussassamik tunniussigaangat
  • Quersuarmiititsinermut aki/ inissaqartitsinermullu akiliutit atuutsinneqartarput tunniussiffissap ullua siulleq tikillugu.
  • Nassiussisoq tunniussiffissap qaangiunnerani tunniussippat, taava tullissaani umiarsuaqarnissaanut tunniussiffissap tulliata tungaanut quersuarmiitsitsinermut/inissaqartitsinermut akiliut atuutsinneqassaaq.
  • Tigusisussap ulloq aallerfissaq kingulleq ullunik tallimanik qaangersimappagu.

Quersuarmiititsinerit/inissaqartitsinermut akiliut atuutsinneqartarpoq weekendiugaluarpat imaluunniit ullut nalliuttorsiorfiugaluarpata. 
Nassiussinermi (LCL) pallenik atornermut, quersuarmiititsinermut/ inissaqartitsinermullu akiliutinut tunngassutillit aalajangersakkat akigitinneqartullu immikkoortumi 4.3-mi atuarneqarsinnaapput.


Sullitat namminneq poortugaannik containerinik (FLC) attartorneq. Sullitat namminneq immigaannik containerinik nassiussinermi containerinik atorneq akiligassanngussaaq inniminniinermi uppernarsaammi nassiussinermiluunniit allagartami ulluliunneqartut qaangerneqarpata.

T
Inissaqartitsinermut akiliut sullitat namminneq immigaannut containerinut (LCL). Inissaqartitsinermut akiliut atuutsinneqartarput “shipper’s own” containerini allanillu FLC-nut atortuni, nassiussinermi inniminniinermik uppernarsaammi nassiussinermiluunniit allagartami ullorititaasut qaangiussimanerisigut. Containerinik atornermi inissaqartitsinermilu akiliutinut tunngassutillit aalajangersakkat akillu sullitat namminneq immigaannut containerinut (LCL), immikkoortuni 4.14-mi aamma 4.13-imi nassaarineqarsinnaapput. 

Kiffartuussinernut taakkununnga uuliamut tapit kiisalu valutamut tunngassutillit tapiliussat akiligassiinermi ilanngunneqarneq-ajorput.

Kiffartuussinerit ilaat momsilerneqartarput, kiffartuussineq Danmarkimi ingerlassinermut attuumassuteqarpat. 

Allat

U
SDR (Special Drawing Rights) tassaavoq nunarsuaq tamakkerlugu aningaasat nalingisa nikerartarnerat, aningaasat nalingisa assigiinngitsut nikerarnerisa agguaqatigiinneranik imaqartoq. Tamanna naatsorsuinermi patajaatsumik atorneqartarpoq taarsiisoqassatillugu.