Royal Arctic Line ukiup affaani siullermi ilimagisatut angusaqarpoq
Royal Arctic Linep ineriartornera 2019-imi ukiup affaani siullermi pitsaajuarsinnarpoq. Umiarsuit angalanissaannut pilersaarutinut tunngatillugu tatiginassuseqarpugut, upernaami silamik annertunerusumik ajornartorsiuteqarsimannginnerput iluaqutigilluarlugu.
Royal Arctic Linemi 2019-imi ukiup affaani siullermi ingerlatsinerup iluani angusat (EBITDA) 18 millionit DKKmiipput (Arctic Umiaq Line ilanngullugu), tamannalu 2018-imi piffissap taamaalineranut naleqqiullugu 7 millionit DKKnik kinguariarneruvoq (2018: 11 millionit). Tassani ilaapput Spaniami umiarsualiorfimmi Nodosami, umiarsuit nunaqarfiliartaatit nutaat marluk maanna sananeqarfianni, umiarsuarmik ilusilersuinerup aningaasartuuteqarfiunerunissaata nalorninartoqartinneranut 16.7 millioninik sillimmatissatut immikkoortitsisoqarnera.
Malugeqqussavarput Royal Arctic Linep ingerlaartarfii eqqarsaatigalugit piffissat suliassaqartitsiffiunerusut nikerangaatsiartarneri pissutigalugit ukiup affaa siulleq nalinginnaasumik amigaartooruteqarfiusarmat, ukiup affaani kingullermi matussuserneqartartumik.
Assartuussinermut ammasumik aaqqissuussineq ornitarput qalliartorpoq. Eimskipip suliatigut suleqatiginissaanut apriilip qiteqqunnerani akuersissut pissarsiaraarput, nutaamullu piareersaatit naammassiartorput. Islandimi umiarsuaatileqatigiiffiup Samskipip suliareqqitassanngortitsinera maanna ingerlasoq kinguartitsinermik sunniuteqassanngilaq.
Nutaanik umiarsualiortitsinermut pilersaarutip isumaqatigiinniutigineqarnera ukiup affaani siullermi naammassineqarpoq, umiarsuaatillu pisoqalilersut taarsersorneqarnerisa immikkoortuata aappaa naammassineqarluni, umiarsuaatileqatigiiffiullu nunarput tamakkerlugu aamma siunissami sullissisinnaanissaa taamaalillugu qulakkeerneqarpoq.
Umiarsuartaarput 2150 TEU, Tukuma Arctica, nunaqarfiliartaatillu nutaat nunatsinni umiartortut ilinniartitaanerisa nukittorsarnissaanut nukittuumik sinaakkusiissapput.
Sulisut ineriartornissaannut periarfissat pitsaanerpaat qulaakkeerniarlugit, ingerlatseqatigiiffiup aqunneqarnerata pitsaasuunissaa sullitattalu siunissami pitsaanerpaamik sullinnissaat qulakkeerniarlugu suliffeqarfiup iluani, Sulisoqarnermut, Aningaasaqarnermut IT-mullu immikkoortortaqarfinni nutarsaanermik suliaqarnerput ingerlatiinnassavarput.
Ingerlatseqatigiiffimmi ukioq aallartilluarpoq, usinik assartukkat aamma pitsaasumik amerleriaateqarput. Tamannalu atuunnitsinnut, maanna siunissamilu pitsaanerpaanik periarfissaqartitsissaaq.
Royal Arctic Linep ukiumut naatsorsuutigisai ataatsimut isigalugit siornatigut nalunaarutigineqartunut naleqqiullugit allannguuteqanngillat.
Ukiup affaanut nalunaarusiaq uani atuaruk