TUKUMA ARCTICA

Royal Arctic Linep imarpikkoortaataata nutaap aqqa tassaavoq Tukuma Arctica.

“Nuannaarluta tulluusimaarlutalu imarpikkut assartuisussatut umiarsuassatta nutaap aqqa maanna saqqummiussinnaanngorparput, atiata isumaa ingerlatsivittut ilisarnaatigerusutatsinnut assut tulluartoq”.

– Aviâja Lyberth Lennert
Pisortaanerup tullia, Royal Arctic Line

Ateq Tukuma eqiingasumut tukummaarissumullu, aalassarissumut eqaatsumullu, suliumatuumut qiimasumullu pigitipparput. Ateq tapersersuerpalaartumik piumassuseqarpalaartumillu nipilik aammalu ulappaarissusermik ersersitsisoq. Kalaallit Nunatsinni siuariarnissamut tunngavissamik pilersitseqataanissaq Royal Arctic Linep anguniagarimmagu ateq taanna pitsaasumut isumassarsisitsisinnaasutut isigaarput, aammalu immakkut assartuinerup aaqqissuussaaneratigut umiarsuaatileqatigiiffiup kissaataanut tulluartillugu, tassa sukkasuumik pisariitsumillu assartuisinnaassuseqarneq.

Aamma kalaallisut ateq taanna Kalaallit Nunaannut alapernaalernermik pilersitsisinnaavoq, taamalu Kalaallit Nunaata niueqatiginissaanut soqutiginninnermik allisitsilluni.

Royal Arctic Linep imarpikkoortaatitaassaa Nuka Arctica-mit 50 meteringajannik takineruvoq, containerillu 2.150-it usigisinnaallugit, Nuka Arcticap usigisinnaasai 782-iusut.