Ulloq eqqaaniaaffik attortinnartoq
Suut tamarmik unittutut ipput inuppassuillu ataqqinnillutik sikipput, pingasunngormat nal. 17.41-p missarpiaani, Hans Hedtoftip kingullermik nalunaarutaata ”sukkaatsumik kivivugut”-p tutsiunera eqqorlugu Royal Arctic Linep umiarsuaatai tamarmik sivitsukkamik siggarmata. Tamanna sioqqullugu pisortaaneq Verner Hammeken inunnut 80-it missaanniittunut, ukiut 60-it matuma siornatigut Hans Hedtoft umiiarmat ajunaartut 95-it eqqaaniarlugit umiarsuaatileqatigiiffiup eqqaaniaaneranut takkussimasunut, attortinnartumik oqalugiaateqarpoq. ”Qullilillutik issiaannarsimanerpat? Inuunertik asattuunneqaqqullugu qinusimanerpat?”, pisortaaneq ilaatigut aperaaq, namminerlu ima akilluni: ”Naluarput. Paasinngisaannassallugulu.”
Pisup alianartup kingorna ukiut 60-it ingerlareersullu Royal Arctic Linep eqqaaniaaqataaneranut patsisit pingasut aamma oqaatigai. Siullertut misiginneqataanerput ajunaartunullu ataqqinninnerput takutinniarlugu. Aappaattut imaatigut angalanerup isumannaatsuunissaata uagutsinni tamatigut pingaartinneqartuarneranik eqqaasitsissutaammat, pingajuattullu ajunaartut inuit 95-it, annaaneqanngisaannarsimasussaagaluit, isumannaallisaaneq eqqarsaatigalugu iluaqutaammata qujaniarluta. Iluaqutaapput, umiarsuup tulluusimaarutip malissuarnit tiguneqarnerata kingorna ukiukkut umiarsuarluni Kalaallit Nunaannukartarnerup isumannaannerunissaanik pisortat piumasaqalermata, ukiuuneranilu ilaasoqarluni angallassineq annikillillugu killiliiffigineqarmat.
Ajunaartunut ilaqutaasut arlallit umiarsualivitoqqamut peqataajartorput, soorlu allat aamma eqqaaniaaqataarusullutik takkussimasut qamannga qujanertik oqaatigigaat, soorlu biskop Sofiannguaq Petersenip.
Erinarsoqatigiit Erinnat tusarnersorsuarmik tussiarput, siullermik ”Guutiga illimmi” kingullertullu inuunermut nersorinnissut ”Qujavunga”, tussiarnerisalu persuarsiorneq pisimasullu ilungersunassusia ersersippaat.
Pingasunngornerup ingerlanerani Hans Egedep Oqaluffiani eqqaaniaalluni naalagiartoqarmat Royal Arctic Line aamma peqataavoq. Aamma tassani Verner Hammeken – kalaallisut – oqalugiarpoq, biskoppip oqaluussinerata saniatigut oqalugiartuni kisiartaalluni.
Assit umiarsualivitoqqami eqqaaniaanermeersuupput, Ann-Britta A. Olsvigip assilisai. Assimi ataatsimi Nunap Isuata kujataatungaani Hans Hedtoftip kiviffiata piffissaa sumiiffiatalu ilisimaneqartup kingulliup sapinngisamik qaninnerpaaffia eqqorlugu Naja Arcticap naalagaa Jens Peter Berthelsen aqumiorlu Jørn Odgaard kransimik imaanut ilisinngitsiarneranni takuneqarsinnaapput.
