07.05.18 08:00

Suliffeqarfittut allanngorsarsinnaassuseqarneq akeqarpoq

 

Royal Arctic Linemi sulisut naammagisimaarinninnerat 2017-imi unammillernartuusimavoq. 2017-imi 71-imiit 68-imut appariaateqarsimavoq, Kalaallit Nunaanni naammagisimaarinninneq annertunerulluni, umiarsuarni Aalborgimilu appasinnerulluni. 2015-imi naliliineq 75-imiissimavoq.

Pilersissavarput assartuineq patajaannerusoq, akulikisuanerusoq imminullu akilersinnaanerusoq. Angallavigut ammanerullutillu eqaannerussapput, august 2019-imiillu nunatta nunarsuarmi ersittunngortinnissaa pilersikkumavarput. Allat assartuinermik ingerlatsisut suleqatigalugit Atlantikup imartaatigut uummaarinnerusumik assartuinerit ingerlatilissavagut – aammalu umiarsualiviit pitsaanerpaat aqqusaartugarilerlugit.

Tamakku angujumallugit suut tamangajaasa allanngortiterpagut. Siunnerfigisagut, niueriaatsigut, sulisulerinerput, suleriutsigut aqutsissutigullu. Maannamut ulapinnikooqaagut. Umiarsuaatigut nutaanngiliartorput aqutsissutillu nutanngilisut navialisitsisinnaasimallutik. Sulisorpassuit sullissarpassuillu allannguutit annertuut malugisimavaat aammalu taarsiullugit eqqussuunneqartut, matoqqasumik ingerlatsinitsinniit eqaannerusumut ikaarsaarniarnitsinni pisartut. Sulisutta suliffeqarfitsinnik naammagisimaarinninnerannik 2017-imi misissuinitsinni angusagut 3 pointinik appariarput, minnerunngitsumik avataanit qanoq isigineqarnitsinnik nammineq nalilersuinitsinnut atatillugu, aammalu sulisutta ilaasa akornanni toqqissimajunnaariartorsimanerit eqqarsaatigalugit.   

Allanngoriartornernut naleqqussarsinnaaneq pingaaruteqaleriartuinnarpoq. Aamma pingaartuuvoq nassuerutigissallugu, pisussanik kinguartiterigutta kikkunnulluunniit iluaqutaanavianngimmat, qularutissaananilu allanngortiterineq ingerlatissallugu pisariaqavissuusoq.  Maannamut allanngortiterinitsinni angusatsigut kingunerisaasumik, unamminartussatut aggersut akiorsinnaajartuinnarpagut. Tamannalu ilutigalugu sulerusussuseq aamma annertusiartussaaq.

Suli suliassaqaqaagut, ilorraalli tungaanut ingerlavugut. Naleqqussarnissaq akisussaaffittut tiguarput. Eqqarsaatigilluagaasumik periusissatut siunnerfiliussaasut malillugit sulivugut, taamallu isumannaarniarsaralugit ukiuni aggersuni umiarsuaatileqatigiiffiup Kalaallillu Nunaata pitsaasumik ineriartuutissaat. Siunnerfeqarluartumik Kalaallit Nunaat niueqatigiuminartunngorsarlugu sulivugut.

Taamatut iliornitsigut Kalaallit Nunaata pisuunerulertinnissaa angujumallugu periarfissat akisussaaqataaffigisatut tiguagut. Tamatigorluinnaq.