08.05.18 08:00

Sinneqartooruteqarnissaq immineq pingaarnerpaajunngilaq

 

Royal Arctic Line-imit tulluusimaarutigaarput pingaartumik akisussaaffeqarnerput: Tassalu Kalaallit Nunaat tamakkerlugu imaatigut pilersuinermik isumannaarinninnissarput. 

Kisianni naammanngilaq pilersuinermik pisussaaffiligaanerup kisimi naammassinissaa. Tamannali ingerlattariaqarparput, ilaatigut nutaanik umiarsuartaartarnikkut allatigullu ingerlaavartumik nutaanik atortussarsiortortarnikkut. Kiisalu Kalaallit Nunaannut periarfissiissutiginiassavarput aningaasaqarnikkut ineriartortitsinerup pitsanerpaamik sunniuteqartinissaa.

2015-imi periusissanik toqqaagatta siunnerfigaarput Kalaallit Nunaata niueqatigiuminarnerusunngorsarnissaa. Taamatut siunnerfilinerrmi anguniarumaneqarput, aningaasartuutit appartinnissaat, sullissanik pitsaanerusumik sullissinissaq, nunarsuup sinneranut, ”qumaraluttuinnartutut ittumut” naleqqussarsinnaassuseqalernissaq, taamatullu periarfissanik amerliartuinnartunik ammaassinermut naleqqussarsinnaanissaq. Aggustip qaammataani 2019-imi umiarsuit nutaat sapaatip akunnerakkuutaartumik DK aamma Kalaallit Nunaata akornanni ukioq naallugu angalasalissapput, aammalu Island aqqusaarlugu angalasarnerit pitsaanerulissallutik.

Tamanna angussavarput umiarsuaatitta atortussattalu ingerlaavartumik pisariqartumik nutartertarnerisigut, sulisutta piginnaaninngorsarnerisigut aammalu neqeroorutitta Kalaallit Nunaata niueqatigiuminarnerulersinnissaa siunertaralugu siunnerfigut naammassigutsigit. Avataani pissutsinut pisartunullu naleqqussarumavugut, siunissaq isigalugu eqqarsarusuppugut, umiarsuaatigut ukiuni 15-20-ini atorsinnaanissaat anguniarniarparput aammalu suli ingerlatsillaqqinnerulernissarput unammiugassatsitut tigummiuarumallugit, sullissatsinnut sulisutsinnut Kalaallillu Nunaannut nuannaarutaasussamik.

Piffissaq ungasissoq eqqarsaatigalugu eqqarsarutta, taava akit atukkagut qaffattariaqassanngilagut, ukiut marlussuilluunniit suut killormut ingerlasutut ikkaluarpataluunniit. Royal Arctic Line amerlasuunik sinneqartooruteqarpat, taakku sullissat innuttaasullu akilersuinerannit pinngortuussapput. Taamaattumik tamatuma angunissaa immineq siunnerfiunngilaq.

Taamaattumillu pilersaarusiornitsinni tunngavigaarput piujuaannartitsinissaq siunertaralugu aningaasaqarniarnissamut tikkuussissusiaq, tamatumalu ingerlaavartumik piffissaq ungasinnerusoq isigalugu aaliangiiniarnitsinni ikiortuartarpaatigut. Sulivugut isumannaarniarlugu Royal Arctic Linep suliassaminik naammassinnissinnaajuarnissaa aaqqiissutit pitsaanerpaat akillu appasinnerpaat atorlugit. Tunngavissiaq pineqartoq aamma peqqutaavoq, ukiut pitsaavallaanngitsut aqqussaaraluarlugit piffissamut ungasinnerusumut isigisinnaanitsinnut. Tamanna allanngortiterinerit piuartut pitsaanngorsaaniarnerillu iluini tikkuussiuarpoq. Aamma taaneqartoq aningaasanut tunngasutigut suleqatitsinnut Royal Arctic Linep naleqassusaanik takunnissinnaalersitsivoq.

Royal Arctic Linep ukiuni makkunani attavilersuineq ingerlappaa. Suliniarnerpullu aningasalersuinermik tunuliaqutitsinnit tatigineqarluni tapersersorneqarpoq – taamaattumik Kalaallit Nunaata siunissami, attavilersuineq tunngavigalugu, siunissamut periarfissaqarluarneranik isumalluaateqarnitsinni kisimiinngilagut. Ilami siunertaqarluaqaaq imminut akilersinnaalluartuullunilu Kalaallit Nunaata  niueqatigiuminarsarniarneqarnera.