20.09.17 04:00

Tusagassiusititigut nalunaarut

 

Royal Arctic Line 2017-ip ukiuata affaanut siullermut naatsorsuutiminik saqqummiussivoq.

Ukiup affaanut naatsorsuutit takutippaat ukioq Royal Arctic Line-imut unamminartuusimasoq. Piffissap pineqartup iluani ingerlatsinitsigut eqqornerlunneqarpugut, soorlu Mary Arcticap sikumut aporneratigut, Johanna Kristinap  Tunumi ajoquserneratigut aammalu Arina Arcticap kivittaataanik ajornartorsiuteqarnitsigut.  Nuannaarutigaarpulli ajutoornerit annertunerusut pineqartut inuit inuunerinik akeqanngimmata.

Ukiulli affaani siullermi unamminartut annerpaartarivaat IT-qarnitsigut naammaginartumik ingerlasinnaasimannginnerput. Inniminniinernik aqutsiniarnerput aammalu assartukkat killiffiinik malinnaaniarnerput piffissami pineqartumi naammaginartumik malersorsinnaasimanngilagut pisullu amerliartornerat ilutigalugu, aamma ajornartorsiutit suleriaatsitsinnut ingerlatseriaatsitsinnullu tuniluussimapput. 

”Allanngortiterigatta utoqqatserpugut tukakkata” tassaavoq allagartaq nivinngagassiaq Royal Arctic Line-imut nivinngassallugu tulluunnerpaasimassagaluartoq. Tassami annertuumik Royal Arctic Line-ip allanngortiterinera assersuussassaqqippoq: Royal Arctic Line-imi ukiuni makkunani annertuumik allanngoriartortinneqarpoq piareersarlugu takorluukkap angusinnaanissaa, tassalu Kalaallit Nunaata niueqatigiuminarnerulernissaa. Tamannami pisariaqartitsivoq allannguinissanut aningaasaliinissanullu qunusuissuseqarnissamik.

Taamallu ilisumik januarip qaammataani containerinut umiarsuarmik 2.150 TEU-imik sanatitassamik inniminniilluni isumaqatigiissuteqartoqarpoq aammalu 2019-imiit nutaamik angalariaaseqarnissaq piareersarneqaleruttorluni. Taamallu pisoqarnissaanut qarasaasiakkut atortorissaarutinik nutaanik peqalernissaq pisariaqarsimavoq.

Umiarsuaatileqatigiiffiup Malik Arctica naammassitillugu tiguaa saniatigullu Remontowami umiarsuit marluk sanatinniarneqaraluartut unitsiinnarnerinik utertitsivigineqarnissamillu isumaqatiginninniarnerit imaannaanngeqisut ingerlanneqarlutik. 

Suliffeqarfiup akiligassat allatullu ilanngaatigisassat peereerlugitukiup affaani siullermi amigartooruteqarpoq DKK 28 millioninik, missingersuutini naatsorsuutigineqarsimagaluarluni 15 million koruuninik amigartooruteqarnissaq (2016-imi piffissap taamatut ilinerani angusat 11 million koruuniusimapput).

Angusani ipput nunatta kitaata avannaani siku pissutigalugu kingusinaartumik assartuilersimanerit, 2016-imi 2017-imilu umiarsuarnut nutaanut aningaasaaliisimanerit, Sikuki Nuuk Harbour-imut ilassutitut aningaasartuutit, tuniniaanermut allaffissornermullu aningaasartuutit amerlanerulersimasut, minnerunngitsumik IT-qarnermut aningaasartuuteqarnerulerneq peqqutigalugu. Kiisalu nalikilliliinerit ernianillu nanertuutit umiarsuit nutaat peqqutigalugit amerlisimapput.

Aningaasartuutit taaneqartut, taamaallaat qarasaasiatigut aqutsissutinut tunngasut pinnagit, naatsorsuutigisatut annertussuseqarsimapput. Maannalu tassa piffissanngorpoq ukiorpassuarni nunatta attavilersugaaneranut atatillugu eqqarsaatigineqarsimasunut akiligassat akilissallugit.

Sullississutitta ukiup sinneranut pitsaassutsikkut patajaallisarnissaannut, maannalu ukiup affaata naammaginartumik suliassaqarfiusimanera eqqarsaatigalugit, ukiup sinnerani ukiup affaata kingulliup DKK 5 millionit 15 millionillu akornannik angusaqarfiunissaa naatsorsuutigineqarpoq, tamanna siusinnerusukkut missingersuusiat naapertorlugit DKK 15 aamma 25 million koruuniunissaat naatsorsuutigineqarsimagaluarluni. 

Nuuk, ulloq 20. September 2017

Royal Arctic Line

Paasissutissat annertunerusut uunga pisinnaapput:

Verner Hammeken, CEO, kommunikation@ral.gl

 

Ukuip affaanut nalunaarusiaq uani atuaruk