18.10.17 02:00

Royal Arctic Line nutaamik CFO-taarpoq

 

Atorfimmut piukkunnartussarsiornerup iluatsilluartup kingorna Royal Arctic Linep 27-nik ukiulik Peter Christoffersen 2017-imi decembarip aallaqqaataanit atuutilersumik pisortap tulliatut CFO-tut atornitsippaa.

Peter ilaqutaalu Dubaimit Nuummut nuussapput. Peter Indiami, Kangia qiterlermi Afrikamilu niuernikkut ingerlatsinikkullu automatiseerinermik suliniuteqarnermut akisussaasutut suliffeqarfimmi Mærskip pigisaani atorfimmeersuuvoq.

Peter A. P. Møller-Mærskimi sulinini 2005-imi aallartippaa. Ilinniartuunermi kingorna Afrikami, Københavnimi, Haagimi Dubaimilu pitsanngorsaaneq, naammassisaqarneq nakkutilliinermillu suliat pingaarnerutillugit niuernermik, pilersaarusiornermik naatsorsuutitigullu suliaqarpoq kiisalu aamma aaqqissuussaanikkut allannguinerni malunnaatilinni naatsorsuutitigut nalunaaruteqartarnerup malittarisalittut aaqqissuussinermik suliaqarsimalluni.

Peter CBS-imi cand. oeconitut ilinniagaqarpoq ilinniakkanilu suliniutinik aqutsinermik ingerlatsinermillu pitsanngorsaanermik annertusarsimallugu.

”Kalaallit Nunaannit, Kalaallit Nunaannut nunallu iluani assartuussinermut aaqqissuussinerup siunissamut isumannaarnissaanik Royal Arctic Linemi suliassaqarpugut annertuumik pissanganartumillu. Tamanna allannguutinik annertuunik aammalu aningaasartuutitta tatineqarnerinik pilersitsivoq. Peter assartuussinermut ingerlasussanillu piareersaanermut aqutsinermullu tunngatillugu, aqutsinermut sakkussatigut ingerlatseriaatsinillu pitsanngorsaanissamut piumasaqaateqarfiusunik annertuumik misilittagaqarpoq. Peter pisortaqatigiinnut peqataalernera aaqqissuussaaneq akimorlugu qanoq iliornissamut nukissaqarnerulernitsinnik annertuumik kinguneqassaaq” pisortaaneq Verner Hammeken taama oqarpoq.

Peter Christoffersen oqarpoq: ”Royal Arctic Line suliffeqarfiuvoq Kalaallit Nunaata niueqatiginissaanik ajornannginnerulersitsinissamik takorluugaqarluni annertuumik ineriartorfiusoq. Suleqatitaassakka peqatigalugit imaatigut assartuussinermik suliaqarfigisanni allani misilittakkama atornissaat, tamatumunngalu peqatigitillugu aamma ingerlaqatseqatigiiffiup immikkuullarissup inuiaqatigiinnut annertuumik akissussaaffeqartup ilisimasarilernissaa qilanaarivara”.

Ny Cfo