03.10.17 09:45

Royal Arctic Linep KNR qinnuigaa nalunaarutigisaminik eqqunnginneraaqqullugu: Royal Arctic Linep nutaanik umiarsualiortitsinerani sulisunik Korea avannarlermiunik atuisoqanngilaq

 

KNR-ip nittartagaani allaaserisaq kiisalu Qanoruumi unnuk manna ilanngutassiaq, Polenimi umiarsualiorfimmi Remontowami sulisunik Korea avannarlermiunik atuisoqarsimaneranut tunngasut, Royal Arctic Linep sakkortuumik illuatungilerpai. Umiarsuaatileqatigiiffiup umiarsuarnik sanaartortitsinerani sulisunik Korea avannarlermiunik atuisoqarsimasinnaaneranik, umiarsuaatileqatigiiffiullu taamaattoqarneranik taamaattoqannginneranilluunniit ilisimatinneqarsimannginnera allaaserisami ilanngutassiamilu ersersinneqarpoq.

Royal Arctic Linep umiarsuaataanik sanaartornermut atatillugu suliassat ilaannik ingerlatsisup Armexip  sulisunik taama ittunik atuisimannginneranik umiarsualiorfiup uppernarsaanera naapertorlugu, Royal Arctic Linep KNR-ip tusagassiortuanut ilisimatitsineranit nalunaaquttap akunneri marluk qaangiummata allaaserisaq KNR-ip nittartaatigut saqqummiunneqarpoq. Umiarsualiorfiup aamma uppernarsarpaa sulisunik Korea avannarlermiunik atuisoqarsimanngitsoq, tamannalu aamma suliassat ilaannik ingerlatsisunut atuuttoq.

KNR-ip paasissutissanik kingullernik allaaserisamini ilanngutassiaminilu atuisimannginnera Royal Arctic Linep sakkortuumik isornartorsiorpaa. KNR taamaalilluni qanoq inissisimasoqarneranik ilisimasaqannginnermik Royal Arctic Linellu qanoq inissisimasoqarneranut paasissutissanik suli pissarsiniarsimannginneranik ersersitsivoq. Eqqortorli tassaavoq Royal Arctic Linep pineqartoq sapaatit akunnerata naanerata ingerlanerani misissuiffigimmagu, allaaserisallu KNR-ip nittartagaatigut saqqummiunneqarnissaa nalunaaquttap akunnerinik marlunnik sioqqullugu tusagassiortumut pineqartumut saaffiginnimmat.

KNR-ip pissusiviusut pillugit eqqunngitsumik saqqummiussinera Umiarsuaatileqatigiiffimmut innarliisutut nukinnillu asuli atuisitsinertut Royal Arctic Linep isigaa. Taamaammat Royal Arctic Linep KNR qinnuigaa nittartakkamigut KNR-illu Qanoruuatigut nalunaarutigisaminik erseqqissumik eqqunnginneraaqqullugu, tamatumanilu KNR-ip nassuerutigissavaa nittartakkami allaaserisamut TV-kkullu ilanngutassiamut tusagassiornikkut suliaqarnermi paasissutissat pissarsiarineqartut kingulliit atorneqarsimanngitsut.