30.11.17 01:00

Tusagassiorfinnut nalunaarut: Royal Arctic Line pisarnini malillugu kukkunerit nalunaarutigisarpai

 

Royal Arctic Line, containerit kukkusumik ingerlanneqartut juulip qaammataani annertuumik amerleriaateqarneriniilli kisitsisitigut paasissutissanik sapaatit akunnikkuutaartumik saqqummiussisarpoq. Kisitsisitigut paasissutissat pineqartut Royal Arctic Linep nittartagaatigut sapaatit akunneri tamaasa saqqummiunneqartarput. Taamaammat pitsaassuserput pillugu tusagassiorfinnut nalunaarutinik nassiussineq ajorpugut.

Sermitsiap allaaserisaani ”RAL-ip kukkuluttornerit aaqqiissuteqarfigai”-mi oqaatigineqartutut, sapaatit akunneranni 47-mi containerit kukkusumik ingerlanneqarnerinik nalaataqarsimannginnerput eqqortuuvoq. Containerinik ingerlatsinerup pitsanngoriarsimasutut isikkoqalernera, sapaatit akunnerannilu 47-mi containerinik kukkusumik ingerlatsisoqarsimannginnera Royal Arctic Linemi naammagisimaartupilussuuarput. Containerinilli ingerlatsineq patajaatsunngortutut oqaatigissallugu suli siusippallaarpoq, maannakkulli suliniutigineqartut patajaallisartuarnissaa paasissutissallu pitsaassusiisa pitsanngorsaanissaat, kiisalu tunniussinermi tigusinermilu piffissap atorneqartup pitsanngorsarnissaa qulakkeertussaavaat.

Royal Arctic Linep Avannaani ukiornissaanut pilersuinerit maanna tamakkiisumik aallutarai. Ukiornissaanut pilersuinerit decembarip qiteqqunnerani naammassineqarsimanissaat naatsorsuutigineqarpoq. Ukiornissaanut pilersuinerit isumannaarnissaannut KNI qanimut suleqatigineqarpoq umiarsualivinniillu allanit suliamut tassunga ikiuuttussanik Aasiannukartitsisoqarpoq.

Novembarip 30-ani 2017