06.03.17 10:00

Royal Arctic Line ilorraap tungaanut ingerlavoq

 

Royal Arctic Line 2016-imi akileraarutinut ilanngaassutissat ilanngaatigineqannginnerini 143 million koruunit missaannik sinneqartooruteqarpoq (2015: 91 millionit), akileraarutinullu ilanngaatissat ilanngaatigereernerini sinneqartoorutit 98 million koruunit missaanniillutik (2015:63 millionit).

2016-imi assartugassat annertusisimapput taakkualu aningaasaqarnermut ilusiliinerpaapput. Kisiannili aamma sinneqartooruteqarnermut peqqutaaqataapput aningaasartuutaasartut annikillisarneqarnera aammalu ingerlatseriaatsimi pitsanngorsaasoqarsimanera. Umiarsuaatileqatigiiffillu eqqarsaatigissagaanni aatsaat taamak annertutigisumik sinneqartooruteqartoqarpoq.

Maanna Remontowa, Poleniminngaanniit umiarsuit sanatinneqarsimasut tamarmik umiarsualiviorfimmiit tunniunneqarnikuupput. Nunaqarfiliartaatsit marluk 36 TEU-mik angissusillit 2016-imi tunniunneqarput ullumikkullu ingerlaarfinni atorneqalereerlutik. Umiarsuaq kingulleq, Malik Arctica, Mary Arcticap assipajaava, februaari 2017-imi tunniunneqarpoq, taannalu ingerlaarfimmut ilanngunneqassalluni 2017-imi maajip qeqqata missaani.

Royal Arctic Lineminngaanniit naatsorsuutigineqarpoq 2017-imi suliassat 2016-imut assingussasut imaluunniit Kalaallit Nunaannut assartorneqartartut, sanaartornerup annikillisimanerata peqqutigisaanik, annikinnerussasut. Kalaallit Nunaata avataanut assartorneqartartut naatsorsuutigineqarput 5 %-imik qaffariaateqassasut tassanilu peqqutaavoq avammut tunisassiarineqartartuni TAC-ip (Total Allowable Catch) 7-10 %-imut qaffatsinneqarsimanera.

Royal Arctic Lineminngaanniit suli aningaasartuutit aqunneqarnerunissaat ukkatarineqarneruniarpoq tassungalu peqqutaavoq 2017-imi umiarsuarnut umiarsualivimmullu nutaamut aningaasartuutissat annertunerusussaanerat, taakkualu aningaasaqarnermut kalluaasussaallutik.

2017-imullu naatsorsuutigineqarpoq Royal Arctic Line A/S-ip sinneqartoorutai akileraarutinut akiliisoqannginnerani 20-30 million koruunit missaanniikkumaartut.

Ukiumut nalunaarusiaq maajip 9-a 2017 ataatsimeersuarnermut atatillugu saqqummiunneqarumaarpoq.