24.03.17 10:00

Ivalo Arcticap Qeqertarsuarmukariaraluarnera

 

Royal Arctic Line Ivalo Arctica atorlugu Qeqertarsuarmukariaraluarput, iluatsinngitsumilli.
Pingasunngorneq marsip 22-at aammalu sisamanngorneq marsip 23-at Ivalo Arctica Qeqertarsuarmut ingerlaaraluarpoq Imerissorlu (Kronprinsens Ejland) tikingajaavittaraluarlugu sikumili ingunerit peqqutaallutik misiliinitik unitsiinnartariaqartarsimallugit. Sila atoruminarnerpaasimanngilaq anorlersimavoq, nittaassimavoq ersernerlussimallunilu.

Irena Arctica Qeqertarsuup tunuaniippoq Ivalo Arcticalu sikumit ingerlaqqissinnaajunnaassagaluarpat ikiortissatut piareersimasimalluni. Irena Arcticalli Qeqertarsuup tunuanut ingerlaarnera aamma unammillernartoqarsimaqaat, tassami umiarsuaq tuaviornerpaamik Qeqertarsuup tunuani ingerlaariarluni kujammut ingerlaqqinniapallattussaagami Kitaatami sikuata Sisimiut Aasiaallu akornani ingerlaarfik matutinnagu umiarsuaq uteriarteqqipallattariaqaratsigu.
Ingerlaarfiup taamaatiinnarneqarneranut peqquterpassuaqarpoq, tassanilu eqqarsaatigineqartariaqartut ilagaat umiarsuarmi sillimaniarneq, sikup ingerlaarnera, silassaq, ingerlaarfiup iluatsinneqarsinnaaneranut ilimanassuseq, utimut ingerlaaqqinnissaq minnerunngitsumillu illoqarfinnut nunaqarfinnullu pisussaaffigut.

Royal Arctic Lineminngaanniit Qeqertarsuup tunuani sikup qanoq issusaa malinnavigineqaannaavippoq, Qeqertarsualiarnissamullu periarfissaqaqqileriarpat misileeqqittoqarumaarluni.

Eqqaasutissiissutiginiarparput Ivalo Arcticap ingerlaarfia ”aappaluttuummat”, taannalu isumaqarpoq siku, sila assartugassallu annertussusaat ajunngippata ingerlaarneq iluatsinneqarsinnaasoq.

Apeqqutissaqassagussi Royal Arctic Linep atuisunut kiffartuussivia Kalaallit Nunaanniittoq kundeservice@ral.gl –imut oqarasuaammulluunniit +299 70 15 00-imut saaffigineqarsinnaapput, imaluunniit Atuisunut kiffarfuussivik Danmarkimiittoq booking@ral.gl –imut imaluunniit +45 99 30 30 99-imut saaffigineqarsinnaallutik