25.01.17 08:00

Tusagassiuutinut nalunaarut

 

Royal Arctic Line umiarsuarmik nutaamik Kinami sananeqartussamik inniminniivoq, taamaasiornikkullu Eimskipip suleqatiginiarneqarnissaanut alloriarneq tulleq tiguneqarluni 

Royal Arctic Line A/S januaarip 24-ani 2017 amutsiviit Guangzhou Wenchong Shipyard Co,. Ltd aammalu China Shipbuilding Trading Company Limited Kinamiittut umiarsuarmik nutaamik sananissaannut isumaqatigiissuteqarlutik atsioqatigiipput. Umiarsuarlu nutaaq 2019-imi tunniunneqassaaq.

Umiarsuaq nutaaq Royal Arctic Linep Atlantikukkut ingerlaartartunut umiarsuaannut nutarterinerit aallartinnerivaat, umiarsuullu nutaap umiarsuaatigut ukiunik 25-inik nutaanngissuseqalernikut Naja Arctica Nuka Arcticalu taarsissallugit.

Royal Arctic Lineminngaanniit umiarsuup nutaap inniminnerneqarneratigut Nuummi umiarsualiviup nutaap periarfissiinera atorlualerpaa. Umiarsuaq kraneqartusssaanngilaq, kisiannili kranilersinnaaneranut piareeersagaalluni. Umiarsualivillu nutaaq Kalaallit Nunaanni umiarsualivinnut allanut sanilliullugu aamma periarfissiivoq anginerusumik umiarsuaqarsinnaanissamik. Umiarsuup ilusaata peqqutigisaanik umiarsuaq orsussamik atorluaaneruvoq, umiarsuarlu Royal Arctic Linep oqaluttuarisaanerani siullersaavoq umiarsuarni sanatitassani ingerlatsinermi aningaasartuutit eqqarsaatigineqarnerusut Kalaallit Nunaanni umiarsualivinnut allanut tulassinnaanissaa eqqarsaatigineqarneraniit. Taamaasiornikkullu piviusunngorsinnaasimavoq umiarsuaq 180 meterit missaannik takissuseqarsinnaanera 31 meterillu missaannik silissuseqarsinnaanera. Taamaasillunilu aamma umiarsuaq una Royal Arctic Linep umiarsuaataanni anginerpaajussaaq containerinillu useqarsinnaassusaa 2150 TEU missaannik annertussuseqarluni, tassa Nuka Arcticamiit Naja Arcticamiillu pingasoriaatingajammik useqarsinnaanerulluni.

Umiarsuup sillimaniarnermut avatangiisinullu piumasaqaatit malippaai, taamaasillunilu aamma issittup imartaani Nuummiit Nuummullu angalaarnissamut piumasaqaatit (Polarkodi) aamma malinneqarlutik. Umiarsuup olietankia poortorluarneqarnikuuvoq taassumalu saniatigut aamma maskiinai atortulersorneqarnikuullutik, atortuisalu svovleq kvælstoferlu aniasut annikinnerutippaat. Umiarsuarli suli umiarsuartulli containerinik useqartartutut allatulli sanaajuvoq, taamaasillunilu aninigaasartuutit annikinnerupput. Royal Arctic Lineminngaanniit umiarsuit containerinik usisartut nalinginnaasut atorneqarneratigut nunarsuarmi usitussuseq atorneqartoq atorluarneqarsinnaavoq. Tassuunakkullu aamma siunertaavoq Royal Arctic Line nammineerluni suliarisinnaanasi atorlugu pilersuineq aalaakkaasoq ingerlanneqassasoq aammalu umiarsuaateqarfimminngaanniit suliniutit ingerlanneqarniartut usitussuseq taanna aallaavigalugu suliarisinnaassagaat, tamannalu aamma aningaasanik eqqortumik atuinermik aallaaveqassalluni.

Royal Arctic Line Eimskipilu umiarsuaatileqatigiiffiit umiarsuaataat atorluarneqarnerunissaannik isumaqatigiissummik atsioqatigiinnikuupput, taamaaliornikkut Kalaallit Nunaanni ineriartorneq aqqutissiunniarlugu. Suleqatigiinnerullu uumap Kalaallit Nunaat nunarsuarmut attaveqarnerulersissavaa. Suleqatigiinnermiillu aamma periarfissaq nutaaq tassaalissaaq aalisakkanik avammut tunisassiassanik naammassereersunik tuniniaasoqarnerusinnaanissaq, niuerniallu niuerfissaminnik amerlanerusunik qinigassaqarnerulissallutik. Oqartussaninngaanniit suleqatigiinnissaq akuerineqariarpat siunertaavoq suleqatigiinneq piffissaq siulleq atorlugu aallartinneqassasoq.

Royal Arctic Lineminngaanniit siunertaq Kalaallit Nunaat ajornannginnerusumik niueqatigineqarsinnaanissaa pillugu suliniutiniit paasissutissanik nutaanik peqaraangatta paasissutissiisassaagut.

Nuuk – 25. Januar 2017