17.02.17 12:00

Malik Arctica tunniunneqarpoq

 

Royal Arctic Linep tallimanngornermi 17. februar 2017 m/s Malik Arctica, umiarsuit Polen-imi umiarsualiorfissuarmi Remontowami maajimi ukioq 2013-imi sanatinniarlugit piniarneqarnikuusat kingullersaat tiguaa.

Umiarsuaq Mary Arcticap assigivaa pitsanngorsagaallunili. Soorlu takissusia 114 meter-inngortinneqarnikuuvoq qaavatalu ataani inissat sanatinneqarnikuullutik ilinniartoqarnermi il.il. atorneqartartussatut. Umiarsuaq 10,537 bruttotonsiuvoq maskiinaalu pingaarneq 7.869 kw-iulluni (10.687HK) umiarsuullu usisinnaavai containerit 20 fod-sit 606-it. Umiarsuaq suli Polen-imiikkallalaassaaq sapaatit akunnerni pingasuni suliassat mikinerusut naammassivinniarlugit suli suliarinnittoqartussaammat. Tamatuma kingorna umiarsuaq nunatsinni angalasalernissaminut piariissaaq naatsorsuutigineqarlunilu maajip qaammataani nunatsinnut tikikkumaartoq.

Umiarsuaatileqatigiiffiup qutsavigiumavai umiarsuup sananerani tunniunneqarneranilu  annertuumik suleqataasimasut, qilanaarutaavorlu umiarsuup atulerneqarnissaa, tamanna Kalaallit Nunaata attavilersugaaneranut ukiorpassuarni aggersuni iluaqutaasussaassammat.