12.12.17 11:00

Suli pilersaaruteqarpugut

 

Matumuuna tusagassiorfinnut nalunaaruteqarluta pilersaarutip novembarip qulingani 2017-imi nassiussatta killiffia paasissutissiissutigerusupparput.

Pissusissamisuunngitsumik pisoqaraluartoq Avannaani ukiornissaanut pilersuinerit naammassineqarnissaat aalajangiusimavarput. Avannaani qerititsiviit imaarneqarnissaat pilersaarut malillugu aamma ingerlavoq. Sinerissami illoqarfiit angallavigineqarnerat ukiortaartinnagu aamma iluarseqqinneqassaaq.

Novembarimi ulapittupilussuuvugut decembarimilu aamma suli ulapilluta, umiarsuilli atlantiku ikaarlugu assartuisut siornatigutulli siuleriiaattoorutiginerinik ajornartorsiutit atuukkunnaarput.

a. Naja Arctica 1748 decembarip qulingiluaani tikippoq, angalanermut pilersaarutip iluarseqqinnissaanik naatsorsuuteqarnitsinnit ullut marluk qaangiuttut. Tamatumunnga pissutaanerpaasoq tassaavoq umiarsuup kingullermik tikinnerani Nuummi silarlussimanera. Malik Arctica silarlunnera pissutigalugu aamma ullunik 2-3-nik kinguaattooqqavoq. Tamannali Upernavimmi ukiornissaanut pilersuinermi ikiuisussat ilaqqinnissaannik periarfissiivoq, naak umiarsuup kinguaattooqqanera sivittoqqilaaraluartoq. Pingaarnerpaarli tassaavoq Malik Arcticap 1750-ip ukioq manna nassiussanik kingullernik ukiortaartinnagu apuussinissaa. Malik Arctica taamaalilluni Nanortalimmut ullormi 25.12.2017-imi tikissaaq Qaqortumullu, Narsamut, Paamiunut, Sisimiut Nuummullu Sisimiunullu ulloq 29.12.2017 sioqqullugu tikissalluni. Aasiaat Irena Arcticamik pilersorneqarpoq, aamma ukiortaartinnagu tamanna pissaaq. Angalanermut pilersaarut tamatuma kingorna iluarseqqinneqassaaq ulluni 9/12-inut angalanernut nuussagatta.

b. Containerinik imaqanngitsunik nassiussanillu immikkut ittunik pilersuisussanik marlunnik umiarsualiineq naammassineqarpoq, tamanna neriuutigisatsitut ullunik marlunnik kingusinnerusukkut pigaluartoq, containerinillu imaqanngitsunik amigaateqarneq maanna qaangerneqartutut nalilerparput.

c. Avannaani qerititsiveqarfiit imaarnissannik suliaq aamma inniminniinerit tigusagut naapertorlugit ingerlanneqarpoq.

d. Ukiornissaanut palletsit amerlanersaannut tunngatillugu siammarterneqareerput siammartiterisoqassallunilu.

e. Nuup umiarsualiviani aallartisarneq suli ingerlavoq ukiullu ulapiffiunnginnerpaaffiani ingerlateqqinneqassalluni.

f. Ukiornissaanut pilersuinermi nunaqarfinnut nassiussat isumaginissaannut sulisunik sinerissameersunik tikisitsivugut aammalu Aalborgimi suleqatitsinnit ikiorneqarluarluta.

Aasianni suleqatigut pikkorissut sulilluartullu, sinerissamit Nuummiillu ikiuiartortinneqartut peqatigalugit, Upernaviup Uummannallu pigisaannut Qeqertarsuullu tunuanut ukiornissaanut pilersuinerit kingulliit aaqqissornissaannik suliaqarlutik ulapputeqaleruttorput. Kullorsuaq aamma Nuussuaq umiarsuarmik kingullermik tikinneqareerput. Nassiussat kingulliit sapaatit akunnerini tullerni marlussunni apuunneqarnissaat naatsorsuutigineqarpoq. Pinngortitaq peqqarniitsoq inuuffigaarput taamaammat ukiornissaanut pilersuinerit piareertutut nalilissallugit siusippallaarpoq, pilersaarutilli maannamut malinneqarput, aamma Pajuttaatip pujortuleeraq ajornartorsiortoq ikiorlugu Ilulissanut sapaatiummat kalittariaqarsimagaluaraa.

Piffiit nutaat atulernissaannut piareersaatitut pisariaqartumik Royal Arctic Linemi 2017-ip ingerlanerani allanngortitaqangaatsiarpugut. Systemit nutaat, umiarsualivik nutaaq, aaqqissuussaaneq nutaaq suleriaatsillu nutaat. Allanngortiterinerit tamakku pissutigalugit sulisorpassuit immikkut ittumik sulissuteqartariaqarsimapput. Allanngortiterinerit Royal Arctic Linep tatigineqarneranik sanngiillisaataasumik sunniuteqarsimanerat qularutissaanngilaq. Tamanna paasisinnaalluarparput. Maannali oqaatigisinnaanngorparput systeminik allanngortiterinerit qaangereerlutigit siutsinniikkunnaartullu. Allanngortiterinerit pinngitsooratik pisussat pineqarput. Royal Arctic Linetut nutaatut ilikkagaqarluarpugut. Sullitavut peqatigalugit pitsannguutissat ingerlaavartut suliarinissaat qilanaarivarput, taakkumi ukiumi nutaami siusissukkut sullitatsinnut ajornannginnerulersitsissapput uatsinnullu pisariillisaataallutik.

Nuuk

Decembarip aqqarngani 2017