18.12.17 14:00

Royal Arctic Linep MIO-llu akornanni aningaasaliinissamik isumaqatigiittoqarpoq

 

Umiarsuaatileqatigiiffik Royal Arctic Line A/S aamma Meeqqat pisinnaatitaaffiinut sullissivik MIO ullumikkut ataasinngornermi decembarip 18-iani 2017 isumaqatigiissummik atsiorput. Ilaqutariissuseq nukittooq perorsaanermilu killiliisinnaaneq pillugit atuagaaqqap pilersinneqarnissaanut aningaasaliinissaq isumaqatigiissutigineqarpoq.

Atuagaaraq pilersinneqassaaq MIO-p 2017-ini misissuisitsisimanera tunngavigalugu.

”Qujamasuutigaara Royal Arctic Linep nunatsinni ilaqutariissuseq nukittooq tapersersorniarmagu. Meeqqat pisinnaatitaaffii malissagutsigit, aamma ilaqutariittut qanoq iliuuseqarsinnaanerluta ilisimasariaqarparput. Taamaattumik pisariaqartitsisunut najoqqutassanik tigussaasunik peqartitsinissaq pingaaruteqarpoq”.

-                           Meeqqat illersuisuat, Aviâja Egede Lynge.

”Aningaasaliineq Royal Arctic Linemiit nuannaarutigalugulu tulluusimaarutigaarput. Kalaallit Nunaat tamakkerlugu suliniutinut pingaaruteqartunut pisariaqartunullu tamatta akisussaaffeqarpugut. Suliffeqarfittut inuiaqatigiit akornanni akisussaaqataasutut tulluusimaarutigaarput atuagaaqqap piviusunngortinnissaanut peqataasinnaagatta, qularinngilarpummi inuiaqatigiinni nuannaarutaajumaartoq.”

 -                          Royal Arctic Line, Ann-Britta A. Olsvig

Royal Arctic Line atuakkamut aningaasaliissaaq, atuakkiarineqarnera, assiliartassai, assiliartalersuineq naqiterneqarnera kiisalu siammarterneqarnissaa ilanngullugit atugassanik, tamannalu kr. 130.000,00-inik naleqarpoq.