15.12.16 13:00

Arctic Umiaq Line A/S-imi allannguuteqarnissaq

 

Jette Larsen ukiuni qulini Arctic Umiaq Line A/S-imi pisortaanertut atorfeqareerluni decembarip 31-ani 2016 atorfimminiit suliunnaassaaq.

Arctic Umiaq Line ukiuni qulini kingullerni suliffeqarfittut Kalaallit Nunaata sineriaani ilaasartaatitut qajannaatsuusimavoq ataavartuusimallunilu. Taamannallu ingerlasimaneranut peqqutaaqataasut ilagivaat Jette Larseni Sarfaq Ittummi nutarterisimanera aammalu pingaartitsisimanera ilaasartaammut ilaasut nuannersumik misigisaqartarnissaat.

Arctic Umiaq Line juulip aallaqqaataa 2016 aallarnerfigalugu Royal Arctic Line A/S-imiit 100 %-imik pigineqalerpoq. Tassungalu atatillugu Namminersorlutik Oqartussaninngaanniit amigartoorutaasut matussuserneqassaassapput 2017 aallarnerfigalugu, taamaattumillu suliffeqarfimmi ingerlatseriaaseq allannguuteqartariaqarsimavoq. Arctic Umiaq Linep ingerlanniarneqarnera Royal Arctic Linep aqutsisuiniit ingerlanneqalissaaq, tamannalu Royal Arctic Linemi sulisut peqatigalugit pissalluni.

Arctic Umiaq Linep iluani allannguineq suliffeqarfiup aqunneqarneranut kisimi attuumassuteqarpoq, Arctic Umiaq Linemi allatut allannguuteqartoqassanngilaq suliffeqarfittullu ingerlariaaseq ingerlanneqartoq atorlugu suleriuseq ingerlateqqiinnarneqassalluni.

Tassunga atatillugu Jette Larseni qutsavigerusupparput Arctic Umiaq Linemi ineriartortitseqataasimammat aammalu massakkumut inissisimaffigisaanut ingerlassimammagu.

Paasisaqarnerorusukkaanni saaffissaq:

Verner Hammeken
Royal Arctic Line A/S-imi pisortaaneq