09.09.13 04:00

Ukiup affaa Royal Arctic Linemut ajornakusoortoq

 

Ukiup 2013-ip affaani siullermi Royal Arctic Linep isertitaqarnera pakatsisitsivoq, tamanna Nunatsinnut usit assartukkat annertussusiisa ikinnerannik pissuteqarpoq, ingammik sanaartortitsinermut tunngasutigut

Sanaartornermut tunngasutigut ingerlatsinerup annikinnerunera ukiup affaanut naatsorsuutini, Royal Arctic Linep A/S-ip saqqummiuteqqammigaani, annertuumik malunniuppoq. Tamanna taakkununnga ilanngullugit containerinut immikkut ittumik aningasartuuteqarneq aamma umiarsuarnut pisoqalisunut aserfallatsaaliinermut aningasartuutit amerliartortut pissutaanerupput naatsorsuutitigut aningaasaqarnikkut angusat pakatsinartuunerannut.

Nunatsinnut pilersuinermut piumasaqaataapput Royal Arctic Linep assartuisinnaanerminut annertuumik piareersimatitsinissaa (umiarsuit aamma umiarsualivinnik ingerlatsineq), taamaammat Nunatsinnut usit assartukkat amerlasuusiisa annikitsunnguamilluunniit nikiallannerat isertitaqarnermut annertuumik sunniuteqartarpoq.

Ukiup affaanut naatsorsuutit

Ukiup affaani siullermi 2013-imi naatsorsuutitigut angusat siorna qaffasissutsimik appasinnerujussuupput. Suliffeqarfissuup Royal Arctic Linep 2013-imi ukiup affaanut siullermut naatsorsuutaasa inernerat akileraaruteqannginnermi 59,7 millionit koruuninik amigartooruteqarfiuvoq. Piffissami assingani 2012-imi akileraaruteqannginnermi 22,7 millionit koruunit amigartoorutaapput. Taamaalilluni isertitat appariartorlutik ingerlannerat 2012-imi aallartereersoq ingerlaqqippoq, tamatumani pissutaanerullutik Nunatsinnut assartukkaat annertussusiisa ikiliartornerat.

Nunatsinnut assartukkat annertussusiat kaaviiaartitsinermut pingaaruteqartuupput tassa akigitinneqartunik aaqqissuussineq pissutaalluni. Assartorneqartut taakkut annertussusiat 11.000 m3-nik ikileriarput, tassa 2012-imi ukiup affaanni siullermi 168.000 m3-niit 2013-imi 157.000 m3-nut. Oqaatigineqareersutut ikileriaammut pissutaaneruvoq sanaartornermut atortussanik ikinnerusunik assartuisoqarnera. Taamatuttaaq sullissinissamut akuersissutip avataatigut suliassat aatsitassarsiornermi ingerlatsinerit appariarnerannit sunnerneqarput.

Kaaviiaartitsinerup appariarneranut ilutigitillugu aningaasartuutit annertusipput. Ilaatigut umiarsuaatileqatigiit containerit amerlassusiannik ikilisaanissaq toqqarsimammagu aamma 2013-imi ukiup affaani siullermi containerit attartorneqarsimasut ilaannik utertitsioraaneq aallartinneqarluni. Piffissaq sivikinnerusoq isigalugu tamanna ataasiartumik immikkut ittumik aningaasartuutaasunik kinguneqarpoq, tassa inissitsiterilluni assartuinernut aamma iluarsaassinernut, kisianni piffissami ungasinnerusumik sipaaruteqarnermik kinguneqassaaq.

Ukiup 2013-ip sinneranut isumalluaatit

Ukiup affaani siullermi naatsorsuutitigut angusat piviusut aamma matuma siuliani ukiup affaanut kingullermut 2013-imut* piumasaqaataasut tunngavigalugit naatsorsuutigineqarpoq ukioq naallugu naatsorsuutitigut angusat tassaajumaartut akileraaruteqannginnermi millionit koruunit tallimat aamma qulit akornanni.

Paasissutissanut sukumiinerusunut tunngatillugu ukiup affaanut nalunaarusiaq kakkiunneqartoq takuuk imaluunniit siulersuisut siulittaasuat Martha Labansen, martha.labansen@gmail.com - +299 55 44 78 attaveqarfigiuk.

* naatsorsuutigineqartut ukiup affaanut nalunaarusiamik sukumiinerusumik allaaserineqarput