01.05.13 08:00

Royal Arctic Line MRN-imut akitsuut apparpaa

 

Inatsisitigut piumasaqaataasoq EU-mut isumannaallisaanermut uppernarsaateqarnermut akitsuut, MRN-imut akitsuummik taaneqartartoq – maannakkut 50 koruuniniit appartinneqarpoq 40 koruuninut.

Akitsuut nassiussanut tamanut MRN-imik normulinnut suli atuuppoq – taamaattorli nassiussat Nunatsinnukartut nalingisa ilisimatitsissutigineqartut 3.000 koruunit ataassimappassuk taava taakku akitsuuserneqassanngillat.

Royal Arctic Linemut aamma piginnittumut Namminersorlutik Oqartussanut pingaaruteqarpoq MRN-imut akitsuutip taamaallaat EU-mut uppernarsaasersuinermi aningaasartuutiviit matussusissammagit. Ukioq manna kvartalimi siullermi misilittakkat tunngavigalugit Royal Arctic Linemit nalilerneqarpoq akitsuut 50 koruuniusoq sinneqartooruteqalaarnermik kinguneqarsinnaasoq. Taamaattumik uagut piginnittut suleqatigalugit akitsuutip 40 koruuninut ingerlaannartumik atuutilersumik (1. maaji) appartinneqarnissaanut aalajangerpugut.

Paasissutissat sukumiinerusut pillugit attaveqarfigiuk sullittakkat sullinneqarnerannut pisortaq Lars Borris Pedersen – kundeservice@ral.gl This email address is being protected from spambots. You need JavaScript enabled to view it. - +299 34 91 00.